From StotraSamhita

EkAdazO'dhyAyaH

zrIzuka uvAca

athO surAH pratyupalabdhacEtasaH parasya puMsaH parayAnukampayA| jaghnurbhRzaM zakrasamIraNAdayastAMstAnraNE yairabhisaMhatAH purA||1||

vairOcanAya saMrabdhO bhagavAnpAkazAsanaH| udayacchadyadA vajraM prajA hA hEti cukruzuH||2||

vajrapANistamAhEdaM tiraskRtya puraHsthitam| manasvinaM susampannaM vicarantaM mahAmRdhE||3||

naTavanmUDha mAyAbhirmAyEzAnnO jigISasi| jitvA bAlAnnibaddhAkSAnnaTO harati taddhanam||4||

ArurukSanti mAyAbhirutsisRpsanti yE divam| tAndasyUnvidhunOmyajJAnpUrvasmAcca padAdadhaH||5||

sO'haM durmAyinastE'dya vajrENa zataparvaNA| zirO hariSyE mandAtmanghaTasva jJAtibhiH saha||6||

zrIbaliruvAca

saGgrAmE vartamAnAnAM kAlacOditakarmaNAm| kIrtirjayO'jayO mRtyuH sarvESAM syuranukramAt||7||

tadidaM kAlarazanaM jagatpazyanti sUrayaH| na hRSyanti na zOcanti tatra yUyamapaNDitAH||8||

na vayaM manyamAnAnAmAtmAnaM tatra sAdhanam| girO vaH sAdhuzOcyAnAM gRhNImO marmatADanAH||9||

zrIzuka uvAca

ityAkSipya vibhuM vIrO nArAcairvIramardanaH| AkarNapUrNairahanadAkSEpairAha taM punaH||10||

EvaM nirAkRtO dEvO vairiNA tathyavAdinA| nAmRSyattadadhikSEpaM tOtrAhata iva dvipaH||11||

prAharatkulizaM tasmA amOghaM paramardanaH| sayAnO nyapatadbhUmau chinnapakSa ivAcalaH||12||

sakhAyaM patitaM dRSTvA jambhO balisakhaH suhRt| abhyayAtsauhRdaM sakhyurhatasyApi samAcaran||13||

sa siMhavAha AsAdya gadAmudyamya raMhasA| jatrAvatADayacchakraM gajaM ca sumahAbalaH||14||

gadAprahAravyathitO bhRzaM vihvalitO gajaH| jAnubhyAM dharaNIM spRSTvA kazmalaM paramaM yayau||15||

tatO rathO mAtalinA haribhirdazazatairvRtaH| AnItO dvipamutsRjya rathamAruruhE vibhuH||16||

tasya tatpUjayankarma yanturdAnavasattamaH| zUlEna jvalatA taM tu smayamAnO'hananmRdhE||17||

sEhE rujaM sudurmarSAM sattvamAlambya mAtaliH| indrO jambhasya saGkruddhO vajrENApAharacchiraH||18||

jambhaM zrutvA hataM tasya jJAtayO nAradAdRSEH| namucizca balaH pAkastatrApEtustvarAnvitAH||19||

vacObhiH paruSairindramardayantO'sya marmasu| zarairavAkiranmEghA dhArAbhiriva parvatam||20||

harIndazazatAnyAjau haryazvasya balaH zaraiH| tAvadbhirardayAmAsa yugapallaghuhastavAn||21||

zatAbhyAM mAtaliM pAkO rathaM sAvayavaM pRthak| sakRtsandhAnamOkSENa tadadbhutamabhUdraNE||22||

namuciH paJcadazabhiH svarNapuGkhairmahESubhiH| Ahatya vyanadatsaGkhyE satOya iva tOyadaH||23||

sarvataH zarakUTEna zakraM sarathasArathim| chAdayAmAsurasurAH prAvRTsUryamivAmbudAH||24||

alakSayantastamatIva vihvalA vicukruzurdEvagaNAH sahAnugAH| anAyakAH zatrubalEna nirjitA vaNikpathA bhinnanavO yathArNavE||25||

tatasturASADiSubaddhapaJjarAdvinirgataH sAzvarathadhvajAgraNIH| babhau dizaH khaM pRthivIM ca rOcayansvatEjasA sUrya iva kSapAtyayE||26||

nirIkSya pRtanAM dEvaH parairabhyarditAM raNE| udayacchadripuM hantuM vajraM vajradharO ruSA||27||

sa tEnaivASTadhArENa zirasI balapAkayOH| jJAtInAM pazyatAM rAjanjahAra janayanbhayam||28||

namucistadvadhaM dRSTvA zOkAmarSaruSAnvitaH| jighAMsurindraM nRpatE cakAra paramOdyamam||29||

azmasAramayaM zUlaM ghaNTAvaddhEmabhUSaNam pragRhyAbhyadravatkruddhO hatO'sIti vitarjayan prAhiNOddEvarAjAya ninadanmRgarADiva||30||

tadApatadgaganatalE mahAjavaM vicicchidE haririSubhiH sahasradhA| tamAhanannRpa kulizEna kandharE ruSAnvitastridazapatiH zirO haran||31||

na tasya hi tvacamapi vajra UrjitO bibhEda yaH surapatinaujasEritaH| tadadbhutaM paramativIryavRtrabhittiraskRtO namucizirOdharatvacA||32||

tasmAdindrO'bibhEcchatrOrvajraH pratihatO yataH| kimidaM daivayOgEna bhUtaM lOkavimOhanam||33||

yEna mE pUrvamadrINAM pakSacchEdaH prajAtyayE| kRtO nivizatAM bhAraiH patattraiH patatAM bhuvi||34||

tapaHsAramayaM tvASTraM vRtrO yEna vipATitaH| anyE cApi balOpEtAH sarvAstrairakSatatvacaH||35||

sO'yaM pratihatO vajrO mayA muktO'surE'lpakE| nAhaM tadAdadE daNDaM brahmatEjO'pyakAraNam||36||

iti zakraM viSIdantamAha vAgazarIriNI| nAyaM zuSkairathO nArdrairvadhamarhati dAnavaH||37||

mayAsmai yadvarO dattO mRtyurnaivArdrazuSkayOH| atO'nyazcintanIyastE upAyO maghavanripOH||38||

tAM daivIM giramAkarNya maghavAnsusamAhitaH| dhyAyanphEnamathApazyadupAyamubhayAtmakam||39||

na zuSkENa na cArdrENa jahAra namucEH ziraH| taM tuSTuvurmunigaNA mAlyaizcAvAkiranvibhum||40||

gandharvamukhyau jagaturvizvAvasuparAvasU| dEvadundubhayO nEdurnartakyO nanRturmudA||41||

anyE'pyEvaM pratidvandvAnvAyvagnivaruNAdayaH| sUdayAmAsurasurAnmRgAnkEsariNO yathA||42||

brahmaNA prESitO dEvAndEvarSirnAradO nRpa| vArayAmAsa vibudhAndRSTvA dAnavasaGkSayam||43||

zrInArada uvAca

bhavadbhiramRtaM prAptaM nArAyaNabhujAzrayaiH| zriyA samEdhitAH sarva upAramata vigrahAt||44||

zrIzuka uvAca

saMyamya manyusaMrambhaM mAnayantO munErvacaH| upagIyamAnAnucarairyayuH sarvE triviSTapam||45||

yE'vaziSTA raNE tasminnAradAnumatEna tE| baliM vipannamAdAya astaM girimupAgaman||46||

tatrAvinaSTAvayavAnvidyamAnazirOdharAn| uzanA jIvayAmAsa saJjIvanyA svavidyayA||47||

balizcOzanasA spRSTaH pratyApannEndriyasmRtiH parAjitO'pi nAkhidyallOkatattvavicakSaNaH||48||

||iti zrImadbhAgavatE mahApurANE pAramahaMsyAM saMhitAyAM aSTamaskandhE EkAdazO'dhyAyaH||

See Also

• http://vedabase.net/sb/8/11/en