From StotraSamhita
< Bhagavatam | Skandha 11
zrIbrAhmaNa uvAca
parigrahO hi duHkhAya yadyatpriyatamaM nRNAm| anantaM sukhamApnOti tadvidvAnyastvakiJcanaH||1|| |
sAmiSaM kuraraM jaghnurbalinO'nyE nirAmiSAH| tadAmiSaM parityajya sa sukhaM samavindata||2|| |
na mE mAnApamAnau stO na cintA gEhaputriNAm| AtmakrIDa AtmaratirvicarAmIha bAlavat||3|| |
dvAvEva cintayA muktau paramAnanda Aplutau| yO vimugdhO jaDO bAlO yO guNEbhyaH paraM gataH||4|| |
kvacitkumArI tvAtmAnaM vRNAnAngRhamAgatAn| svayaM tAnarhayAmAsa kvApi yAtESu bandhuSu||5|| |
tESAmabhyavahArArthaM zAlInrahasi pArthiva| avaghnantyAH prakOSThasthAzcakruH zaGkhAH svanaM mahat||6|| |
sA tajjugupsitaM matvA mahatI vRIDitA tataH| babhaJjaikaikazaH zaGkhAndvau dvau pANyOrazESayat||7|| |
ubhayOrapyabhUdghOSO hyavaghnantyAH svazaGkhayOH| tatrApyEkaM nirabhidadEkasmAnnAbhavaddhvaniH||8|| |
anvazikSamimaM tasyA upadEzamarindama| lOkAnanucarannEtAnlOkatattvavivitsayA||9|| |
vAsE bahUnAM kalahO bhavEdvArtA dvayOrapi| Eka Eva vasEttasmAtkumAryA iva kaGkaNaH||10|| |
mana Ekatra saMyuJjyAjjitazvAsO jitAsanaH| vairAgyAbhyAsayOgEna dhriyamANamatandritaH||11|| |
yasminmanO labdhapadaM yadEtacchanaiH zanairmuJcati karmarENUn| sattvEna vRddhEna rajastamazca vidhUya nirvANamupaityanindhanam||12|| |
tadaivamAtmanyavaruddhacittO na vEda kiJcidbahirantaraM vA| yathESukArO nRpatiM vrajantamiSau gatAtmA na dadarza pArzvE||13|| |
EkacAryanikEtaH syAdapramattO guhAzayaH| alakSyamANa AcArairmunirEkO'lpabhASaNaH||14|| |
gRhArambhO hi duHkhAya viphalazcAdhruvAtmanaH| sarpaH parakRtaM vEzma pravizya sukhamEdhatE||15|| |
EkO nArAyaNO dEvaH pUrvasRSTaM svamAyayA saMhRtya kAlakalayA kalpAnta idamIzvaraH Eka EvAdvitIyO'bhUdAtmAdhArO'khilAzrayaH||16|| |
kAlEnAtmAnubhAvEna sAmyaM nItAsu zaktiSu| sattvAdiSvAdipuruSaH pradhAnapuruSEzvaraH||17|| |
parAvarANAM parama AstE kaivalyasaMjJitaH| kEvalAnubhavAnanda sandOhO nirupAdhikaH||18|| |
kEvalAtmAnubhAvEna svamAyAM triguNAtmikAm| saGkSObhayansRjatyAdau tayA sUtramarindama||19|| |
tAmAhustriguNavyaktiM sRjantIM vizvatOmukham| yasminprOtamidaM vizvaM yEna saMsaratE pumAn||20|| |
yathOrNanAbhirhRdayAdUrNAM santatya vaktrataH| tayA vihRtya bhUyastAM grasatyEvaM mahEzvaraH||21|| |
yatra yatra manO dEhI dhArayEtsakalaM dhiyA| snEhAddvESAdbhayAdvApi yAti tattatsvarUpatAm||22|| |
kITaH pEzaskRtaM dhyAyankuDyAM tEna pravEzitaH| yAti tatsAtmatAM rAjanpUrvarUpamasantyajan||23|| |
EvaM gurubhya EtEbhya ESA mE zikSitA matiH| svAtmOpazikSitAM buddhiM zRNu mE vadataH prabhO||24|| |
dEhO gururmama viraktivivEkahEtur bibhratsma sattvanidhanaM satatArtyudarkam| tattvAnyanEna vimRzAmi yathA tathApi pArakyamityavasitO vicarAmyasaGgaH||25|| |
jAyAtmajArthapazubhRtyagRhAptavargAn puSnAti yatpriyacikIrSayA vitanvan| svAntE sakRcchramavaruddhadhanaH sa dEhaH sRSTvAsya bIjamavasIdati vRkSadharmaH||26|| |
jihvaikatO'mumapakarSati karhi tarSA ziznO'nyatastvagudaraM zravaNaM kutazcit| ghrANO'nyatazcapaladRkkva ca karmazaktir bahvyaH sapatnya iva gEhapatiM lunanti||27|| |
sRSTvA purANi vividhAnyajayAtmazaktyA vRkSAnsarIsRpapazUnkhagadandazUkAn| taistairatuSTahRdayaH puruSaM vidhAya brahmAvalOkadhiSaNaM mudamApa dEvaH||28|| |
labdhvA sudurlabhamidaM bahusambhavAntE mAnuSyamarthadamanityamapIha dhIraH| tUrNaM yatEta na patEdanumRtyu yAvan niHzrEyasAya viSayaH khalu sarvataH syAt||29|| |
EvaM saJjAtavairAgyO vijJAnAlOka Atmani| vicarAmi mahImEtAM muktasaGgO'nahaGkRtaH||30|| |
na hyEkasmAdgurOrjJAnaM susthiraM syAtsupuSkalam| brahmaitadadvitIyaM vai gIyatE bahudharSibhiH||31|| |
zrIbhagavAnuvAca
ityuktvA sa yaduM viprastamAmantrya gabhIradhIH| vanditaH svarcitO rAjJA yayau prItO yathAgatam||32|| |
avadhUtavacaH zrutvA pUrvESAM naH sa pUrvajaH sarvasaGgavinirmuktaH samacittO babhUva ha||33|| |
||iti zrImadbhAgavatE mahApurANE pAramahaMsyAM saMhitAyAM EkAdazaskandhE navamO'dhyAyaH||
