From StotraSamhita

SaSThO'dhyAyaH

RSiruvAca

iti tAsAM svazaktInAM satInAmasamEtya saH| prasuptalOkatantrANAM nizAmya gatimIzvaraH||1||

kAlasaJjJAM tadA dEvIM bibhracchaktimurukramaH| trayOviMzati tattvAnAM gaNaM yugapadAvizat||2||

sO'nupraviSTO bhagavAMzcESTArUpENa taM gaNam| bhinnaM saMyOjayAmAsa suptaM karma prabOdhayan||3||

prabuddhakarma daivEna trayOviMzatikO gaNaH| prEritO'janayatsvAbhirmAtrAbhiradhipUruSam||4||

parENa vizatA svasminmAtrayA vizvasRggaNaH| cukSObhAnyOnyamAsAdya yasminlOkAzcarAcarAH||5||

hiraNmayaH sa puruSaH sahasraparivatsarAn| ANDakOza uvAsApsu sarvasattvOpabRMhitaH||6||

sa vai vizvasRjAM garbhO dEvakarmAtmazaktimAn| vibabhAjAtmanAtmAnamEkadhA dazadhA tridhA||7||

ESa hyazESasattvAnAmAtmAMzaH paramAtmanaH| AdyO'vatArO yatrAsau bhUtagrAmO vibhAvyatE||8||

sAdhyAtmaH sAdhidaivazca sAdhibhUta iti tridhA| virATprANO dazavidha EkadhA hRdayEna ca||9||

smaranvizvasRjAmIzO vijJApitamadhOkSajaH| virAjamatapatsvEna tEjasaiSAM vivRttayE||10||

atha tasyAbhitaptasya katidhAyatanAni ha| nirabhidyanta dEvAnAM tAni mE gadataH zRNu||11||

tasyAgnirAsyaM nirbhinnaM lOkapAlO'vizatpadam| vAcA svAMzEna vaktavyaM yayAsau pratipadyatE||12||

nirbhinnaM tAlu varuNO lOkapAlO'vizaddharEH| jihvayAMzEna ca rasaM yayAsau pratipadyatE||13||

nirbhinnE azvinau nAsE viSNOrAvizatAM padam| ghrANEnAMzEna gandhasya pratipattiryatO bhavEt||14||

nirbhinnE akSiNI tvaSTA lOkapAlO'vizadvibhOH| cakSuSAMzEna rUpANAM pratipattiryatO bhavEt||15||

nirbhinnAnyasya carmANi lOkapAlO'nilO'vizat| prANEnAMzEna saMsparzaM yEnAsau pratipadyatE||16||

karNAvasya vinirbhinnau dhiSNyaM svaM vivizurdizaH| zrOtrENAMzEna zabdasya siddhiM yEna prapadyatE||17||

tvacamasya vinirbhinnAM vivizurdhiSNyamOSadhIH| aMzEna rOmabhiH kaNDUM yairasau pratipadyatE||18||

mEDhraM tasya vinirbhinnaM svadhiSNyaM ka upAvizat| rEtasAMzEna yEnAsAvAnandaM pratipadyatE||19||

gudaM puMsO vinirbhinnaM mitrO lOkEza Avizat| pAyunAMzEna yEnAsau visargaM pratipadyatE||20||

hastAvasya vinirbhinnAvindraH svarpatirAvizat| vArtayAMzEna puruSO yayA vRttiM prapadyatE||21||

pAdAvasya vinirbhinnau lOkEzO viSNurAvizat| gatyA svAMzEna puruSO yayA prApyaM prapadyatE||22||

buddhiM cAsya vinirbhinnAM vAgIzO dhiSNyamAvizat| bOdhEnAMzEna bOddhavyampratipattiryatO bhavEt||23||

hRdayaM cAsya nirbhinnaM candramA dhiSNyamAvizat| manasAMzEna yEnAsau vikriyAM pratipadyatE||24||

AtmAnaM cAsya nirbhinnamabhimAnO'vizatpadam| karmaNAMzEna yEnAsau kartavyaM pratipadyatE||25||

sattvaM cAsya vinirbhinnaM mahAndhiSNyamupAvizat| cittEnAMzEna yEnAsau vijJAnaM pratipadyatE||26||

zIrSNO'sya dyaurdharA padbhyAM khaM nAbhErudapadyata| guNAnAM vRttayO yESu pratIyantE surAdayaH||27||

AtyantikEna sattvEna divaM dEvAH prapEdirE| dharAM rajaHsvabhAvEna paNayO yE ca tAnanu||28||

tArtIyEna svabhAvEna bhagavannAbhimAzritAH| ubhayOrantaraM vyOma yE rudrapArSadAM gaNAH||29||

mukhatO'vartata brahma puruSasya kurUdvaha| yastUnmukhatvAdvarNAnAM mukhyO'bhUdbrAhmaNO guruH||30||

bAhubhyO'vartata kSatraM kSatriyastadanuvrataH| yO jAtastrAyatE varNAnpauruSaH kaNTakakSatAt||31||

vizO'vartanta tasyOrvOrlOkavRttikarIrvibhOH| vaizyastadudbhavO vArtAM nRNAM yaH samavartayat||32||

padbhyAM bhagavatO jajJE zuzrUSA dharmasiddhayE| tasyAM jAtaH purA zUdrO yadvRttyA tuSyatE hariH||33||

EtE varNAH svadharmENa yajanti svaguruM harim| zraddhayAtmavizuddhyarthaM yajjAtAH saha vRttibhiH||34||

EtatkSattarbhagavatO daivakarmAtmarUpiNaH| kaH zraddadhyAdupAkartuM yOgamAyAbalOdayam||35||

tathApi kIrtayAmyaGga yathAmati yathAzrutam| kIrtiM harEH svAM satkartuM giramanyAbhidhAsatIm||36||

EkAntalAbhaM vacasO nu puMsAM suzlOkamaulErguNavAdamAhuH| zrutEzca vidvadbhirupAkRtAyAM kathAsudhAyAmupasamprayOgam||37||

AtmanO'vasitO vatsa mahimA kavinAdinA| saMvatsarasahasrAntE dhiyA yOgavipakkayA||38||

atO bhagavatO mAyA mAyinAmapi mOhinI| yatsvayaM cAtmavartmAtmA na vEda kimutAparE||39||

yatO'prApya nyavartanta vAcazca manasA saha ahaM cAnya imE dEvAstasmai bhagavatE namaH||40||

||iti zrImadbhAgavatE mahApurANE pAramahaMsyAM saMhitAyAM tRtIyaskandhE SaSThO'dhyAyaH||

See Also

• http://vedabase.net/sb/3/6/en