From StotraSamhita

trayOdazO'dhyAyaH

zrIbhagavAnuvAca

sattvaM rajastama iti guNA buddhErna cAtmanaH| sattvEnAnyatamau hanyAtsattvaM sattvEna caiva hi||1||

sattvAddharmO bhavEdvRddhAtpuMsO madbhaktilakSaNaH| sAttvikOpAsayA sattvaM tatO dharmaH pravartatE||2||

dharmO rajastamO hanyAtsattvavRddhiranuttamaH| Azu nazyati tanmUlO hyadharma ubhayE hatE||3||

AgamO'paH prajA dEzaH kAlaH karma ca janma ca| dhyAnaM mantrO'tha saMskArO dazaitE guNahEtavaH||4||

tattatsAttvikamEvaiSAM yadyadvRddhAH pracakSatE| nindanti tAmasaM tattadrAjasaM tadupEkSitam||5||

sAttvikAnyEva sEvEta pumAnsattvavivRddhayE| tatO dharmastatO jJAnaM yAvatsmRtirapOhanam||6||

vENusaGgharSajO vahnirdagdhvA zAmyati tadvanam| EvaM guNavyatyayajO dEhaH zAmyati tatkriyaH||7||

zrIuddhava uvAca

vidanti martyAH prAyENa viSayAnpadamApadAm| tathApi bhuJjatE kRSNa tatkathaM zvakharAjavat||8||

zrIbhagavAnuvAca

ahamityanyathAbuddhiH pramattasya yathA hRdi| utsarpati rajO ghOraM tatO vaikArikaM manaH||9||

rajOyuktasya manasaH saGkalpaH savikalpakaH| tataH kAmO guNadhyAnAdduHsahaH syAddhi durmatEH||10||

karOti kAmavazagaH karmANyavijitEndriyaH| duHkhOdarkANi sampazyanrajOvEgavimOhitaH||11||

rajastamObhyAM yadapi vidvAnvikSiptadhIH punaH| atandritO manO yuJjandOSadRSTirna sajjatE||12||

apramattO'nuyuJjIta manO mayyarpayaJchanaiH| anirviNNO yathAkAlaM jitazvAsO jitAsanaH||13||

EtAvAnyOga AdiSTO macchiSyaiH sanakAdibhiH| sarvatO mana AkRSya mayyaddhAvEzyatE yathA||14||

zrIuddhava uvAca

yadA tvaM sanakAdibhyO yEna rUpENa kEzava| yOgamAdiSTavAnEtadrUpamicchAmi vEditum||15||

zrIbhagavAnuvAca

putrA hiraNyagarbhasya mAnasAH sanakAdayaH| papracchuH pitaraM sUkSmAM yOgasyaikAntikImgatim||16||

sanakAdaya UcuH

guNESvAvizatE cEtO guNAzcEtasi ca prabhO| kathamanyOnyasantyAgO mumukSOratititIrSOH||17||

zrIbhagavAnuvAca

EvaM pRSTO mahAdEvaH svayambhUrbhUtabhAvanaH| dhyAyamAnaH praznabIjaM nAbhyapadyata karmadhIH||18||

sa mAmacintayaddEvaH praznapAratitIrSayA| tasyAhaM haMsarUpENa sakAzamagamaM tadA||19||

dRSTvA mAmta upavrajya kRtva pAdAbhivandanam| brahmANamagrataH kRtvA papracchuH kO bhavAniti||20||

ityahaM munibhiH pRSTastattvajijJAsubhistadA| yadavOcamahaM tEbhyastaduddhava nibOdha mE||21||

vastunO yadyanAnAtva AtmanaH prazna IdRzaH| kathaM ghaTEta vO viprA vakturvA mE ka AzrayaH||22||

paJcAtmakESu bhUtESu samAnESu ca vastutaH| kO bhavAniti vaH praznO vAcArambhO hyanarthakaH||23||

manasA vacasA dRSTyA gRhyatE'nyairapIndriyaiH| ahamEva na mattO'nyaditi budhyadhvamaJjasA||24||

guNESvAvizatE cEtO guNAzcEtasi ca prajAH| jIvasya dEha ubhayaM guNAzcEtO madAtmanaH||25||

guNESu cAvizaccittamabhIkSNaM guNasEvayA| guNAzca cittaprabhavA madrUpa ubhayaM tyajEt||26||

jAgratsvapnaH suSuptaM ca guNatO buddhivRttayaH| tAsAM vilakSaNO jIvaH sAkSitvEna vinizcitaH||27||

yarhi saMsRtibandhO'yamAtmanO guNavRttidaH| mayi turyE sthitO jahyAttyAgastadguNacEtasAm||28||

ahaGkArakRtaM bandhamAtmanO'rthaviparyayam| vidvAnnirvidya saMsAra cintAM turyE sthitastyajEt||29||

yAvannAnArthadhIH puMsO na nivartEta yuktibhiH| jAgartyapi svapannajJaH svapnE jAgaraNaM yathA||30||

asattvAdAtmanO'nyESAM bhAvAnAM tatkRtA bhidA| gatayO hEtavazcAsya mRSA svapnadRzO yathA||31||

yO jAgarE bahiranukSaNadharmiNO'rthAn bhuGktE samastakaraNairhRdi tatsadRkSAn| svapnE suSupta upasaMharatE sa EkaH smRtyanvayAttriguNavRttidRgindriyEzaH||32||

EvaM vimRzya guNatO manasastryavasthA manmAyayA mayi kRtA iti nizcitArthAH| saJchidya hArdamanumAnasaduktitIkSNa jJAnAsinA bhajata mAkhilasaMzayAdhim||33||

IkSEta vibhramamidaM manasO vilAsaM dRSTaM vinaSTamatilOlamalAtacakram| vijJAnamEkamurudhEva vibhAti mAyA svapnastridhA guNavisargakRtO vikalpaH||34||

dRSTimtataH pratinivartya nivRttatRSNas tUSNIM bhavEnnijasukhAnubhavO nirIhaH| sandRzyatE kva ca yadIdamavastubuddhyA tyaktaM bhramAya na bhavEtsmRtirAnipAtAt||35||

dEhaM ca nazvaramavasthitamutthitaM vA siddhO na pazyati yatO'dhyagamatsvarUpam| daivAdapEtamatha daivavazAdupEtaM vAsO yathA parikRtaM madirAmadAndhaH||36||

dEhO'pi daivavazagaH khalu karma yAvat svArambhakaM pratisamIkSata Eva sAsuH| taM saprapaJcamadhirUDhasamAdhiyOgaH svApnaM punarna bhajatE pratibuddhavastuH||37||

mayaitaduktaM vO viprA guhyaM yatsAGkhyayOgayOH| jAnIta mAgataM yajJaM yuSmaddharmavivakSayA||38||

ahaM yOgasya sAGkhyasya satyasyartasya tEjasaH| parAyaNaM dvijazrESThAH zriyaH kIrtErdamasya ca||39||

mAM bhajanti guNAH sarvE nirguNaM nirapEkSakam| suhRdaM priyamAtmAnaM sAmyAsaGgAdayO'guNAH||40||

iti mE chinnasandEhA munayaH sanakAdayaH| sabhAjayitvA parayA bhaktyAgRNata saMstavaiH||41||

tairahaM pUjitaH saMyaksaMstutaH paramarSibhiH pratyEyAya svakaM dhAma pazyataH paramESThinaH||42||

||iti zrImadbhAgavatE mahApurANE pAramahaMsyAM saMhitAyAM EkAdazaskandhE trayOdazO'dhyAyaH||

See Also

• http://vedabase.net/sb/11/13/en