From StotraSamhita

saptaviMzO'dhyAyaH

zrIzuka uvAca

gOvardhanE dhRtE zailE AsArAdrakSitE vrajE| gOlOkAdAvrajatkRSNaM surabhiH zakra Eva ca||1||

vivikta upasaGgamya vrIDItaH kRtahElanaH| pasparza pAdayOrEnaM kirITEnArkavarcasA||2||

dRSTazrutAnubhAvO'sya kRSNasyAmitatEjasaH| naSTatrilOkEzamada idamAha kRtAJjaliH||3||

indra uvAca

vizuddhasattvaM tava dhAma zAntaM tapOmayaM dhvastarajastamaskam| mAyAmayO'yaM guNasampravAhO na vidyatE tE grahaNAnubandhaH||4||

kutO nu taddhEtava Iza tatkRtA lObhAdayO yE'budhalingabhAvAH| tathApi daNDaM bhagavAnbibharti dharmasya guptyai khalanigrahAya||5||

pitA gurustvaM jagatAmadhIzO duratyayaH kAla upAttadaNDaH| hitAya cEcchAtanubhiH samIhasE mAnaM vidhunvanjagadIzamAninAm||6||

yE madvidhAjJA jagadIzamAninastvAM vIkSya kAlE'bhayamAzu tanmadam| hitvAryamArgaM prabhajantyapasmayA IhA khalAnAmapi tE'nuzAsanam||7||

sa tvaM mamaizvaryamadaplutasya kRtAgasastE'viduSaH prabhAvam| kSantuM prabhO'thArhasi mUDhacEtasO maivaM punarbhUnmatirIza mE'satI||8||

tavAvatArO'yamadhOkSajEha bhuvO bharANAmurubhArajanmanAm| camUpatInAmabhavAya dEva bhavAya yuSmaccaraNAnuvartinAm||9||

namastubhyaM bhagavatE puruSAya mahAtmanE| vAsudEvAya kRSNAya sAtvatAM patayE namaH||10||

svacchandOpAttadEhAya vizuddhajJAnamUrtayE| sarvasmai sarvabIjAya sarvabhUtAtmanE namaH||11||

mayEdaM bhagavangOSTha nAzAyAsAravAyubhiH| cESTitaM vihatE yajJE mAninA tIvramanyunA||12||

tvayEzAnugRhItO'smi dhvastastambhO vRthOdyamaH| IzvaraM gurumAtmAnaM tvAmahaM zaraNaM gataH||13||

zrIzuka uvAca

EvaM saGkIrtitaH kRSNO maghOnA bhagavAnamum| mEghagambhIrayA vAcA prahasannidamabravIt||14||

zrIbhagavAnuvAca

mayA tE'kAri maghavanmakhabhaGgO'nugRhNatA| madanusmRtayE nityaM mattasyEndrazriyA bhRzam||15||

mAmaizvaryazrImadAndhO daNDa pANiM na pazyati| taM bhraMzayAmi sampadbhyO yasya cEcchAmyanugraham||16||

gamyatAM zakra bhadraM vaH kriyatAM mE'nuzAsanam| sthIyatAM svAdhikArESu yuktairvaH stambhavarjitaiH||17||

athAha surabhiH kRSNamabhivandya manasvinI| svasantAnairupAmantrya gOparUpiNamIzvaram||18||

surabhiruvAca

kRSNa kRSNa mahAyOginvizvAtmanvizvasambhava| bhavatA lOkanAthEna sanAthA vayamacyuta||19||

tvaM naH paramakaM daivaM tvaM na indrO jagatpatE| bhavAya bhava gOvipra dEvAnAM yE ca sAdhavaH||20||

indraM nastvAbhiSEkSyAmO brahmaNA cOditA vayam| avatIrNO'si vizvAtmanbhUmErbhArApanuttayE||21||

zRIzuka uvAca

EvaM kRSNamupAmantrya surabhiH payasAtmanaH| jalairAkAzagaGgAyA airAvatakarOddhRtaiH||22||

indraH surarSibhiH sAkaM cOditO dEvamAtRbhiH| abhyasiJcata dAzArhaM gOvinda iti cAbhyadhAt||23||

tatrAgatAstumburunAradAdayO gandharvavidyAdharasiddhacAraNAH| jaguryazO lOkamalApahaM harEH surAGganAH sannanRturmudAnvitAH||24||

taM tuSTuvurdEvanikAyakEtavO hyavAkiraMzcAdbhutapuSpavRSTibhiH| lOkAH parAM nirvRtimApnuvaMstrayO gAvastadA gAmanayanpayOdrutAm||25||

nAnArasaughAH saritO vRkSA AsanmadhusravAH| akRSTapacyauSadhayO girayO'bibhranunmaNIn||26||

kRSNE'bhiSikta EtAni sarvANi kurunandana| nirvairANyabhavaMstAta krUrANyapi nisargataH||27||

iti gOgOkulapatiM gOvindamabhiSicya saH anujJAtO yayau zakrO vRtO dEvAdibhirdivam||28||

||iti zrImadbhAgavatE mahApurANE pAramahaMsyAM saMhitAyAM dazamaskandhE pUrvArdhE saptaviMzO'dhyAyaH||

See Also

• http://vedabase.net/sb/10/27/en