From StotraSamhita

saptadazO'dhyAyaH

maitrEya uvAca

EvaM sa bhagavAnvainyaH khyApitO guNakarmabhiH| chandayAmAsa tAnkAmaiH pratipUjyAbhinandya ca||1||

brAhmaNapramukhAnvarNAnbhRtyAmAtyapurOdhasaH| paurAnjAnapadAnzrENIH prakRtIH samapUjayat||2||

vidura uvAca

kasmAddadhAra gOrUpaM dharitrI bahurUpiNI| yAM dudOha pRthustatra kO vatsO dOhanaM ca kim||3||

prakRtyA viSamA dEvI kRtA tEna samA katham| tasya mEdhyaM hayaM dEvaH kasya hEtOrapAharat||4||

sanatkumArAdbhagavatO brahmanbrahmaviduttamAt| labdhvA jJAnaM savijJAnaM rAjarSiH kAM gatiM gataH||5||

yaccAnyadapi kRSNasya bhavAnbhagavataH prabhOH| zravaH suzravasaH puNyaM pUrvadEhakathAzrayam||6||

bhaktAya mE'nuraktAya tava cAdhOkSajasya ca| vaktumarhasi yO'duhyadvainyarUpENa gAmimAm||7||

sUta uvAca

cOditO vidurENaivaM vAsudEvakathAM prati| prazasya taM prItamanA maitrEyaH pratyabhASata||8||

maitrEya uvAca

yadAbhiSiktaH pRthuraGga viprairAmantritO janatAyAzca pAlaH| prajA nirannE kSitipRSTha Etya kSutkSAmadEhAH patimabhyavOcan||9||

vayaM rAjaJjATharENAbhitaptA yathAgninA kOTarasthEna vRkSAH| tvAmadya yAtAH zaraNaM zaraNyaM yaH sAdhitO vRttikaraH patirnaH||10||

tannO bhavAnIhatu rAtavE'nnaM kSudhArditAnAM naradEvadEva| yAvanna naGkSyAmaha ujjhitOrjA vArtApatistvaM kila lOkapAlaH||11||

maitrEya uvAca

pRthuH prajAnAM karuNaM nizamya paridEvitam| dIrghaM dadhyau kuruzrESTha nimittaM sO'nvapadyata||12||

iti vyavasitO buddhyA pragRhItazarAsanaH| sandadhE vizikhaM bhUmEH kruddhastripurahA yathA||13||

pravEpamAnA dharaNI nizAmyOdAyudhaM ca tam| gauH satyapAdravadbhItA mRgIva mRgayudrutA||14||

tAmanvadhAvattadvainyaH kupitO'tyaruNEkSaNaH| zaraM dhanuSi sandhAya yatra yatra palAyatE||15||

sA dizO vidizO dEvI rOdasI cAntaraM tayOH| dhAvantI tatra tatrainaM dadarzAnUdyatAyudham||16||

lOkE nAvindata trANaM vainyAnmRtyOriva prajAH| trastA tadA nivavRtE hRdayEna vidUyatA||17||

uvAca ca mahAbhAgaM dharmajJApannavatsala| trAhi mAmapi bhUtAnAM pAlanE'vasthitO bhavAn||18||

sa tvaM jighAMsasE kasmAddInAmakRtakilbiSAm| ahaniSyatkathaM yOSAM dharmajJa iti yO mataH||19||

praharanti na vai strISu kRtAgaHsvapi jantavaH| kimuta tvadvidhA rAjankaruNA dInavatsalAH||20||

mAM vipATyAjarAM nAvaM yatra vizvaM pratiSThitam| AtmAnaM ca prajAzcEmAH kathamambhasi dhAsyasi||21||

pRthuruvAca

vasudhE tvAM vadhiSyAmi macchAsanaparAGmukhIm| bhAgaM barhiSi yA vRGktE na tanOti ca nO vasu||22||

yavasaM jagdhyanudinaM naiva dOgdhyaudhasaM payaH| tasyAmEvaM hi duSTAyAM daNDO nAtra na zasyatE||23||

tvaM khalvOSadhibIjAni prAksRSTAni svayambhuvA| na muJcasyAtmaruddhAni mAmavajJAya mandadhIH||24||

amUSAM kSutparItAnAmArtAnAM paridEvitam| zamayiSyAmi madbANairbhinnAyAstava mEdasA||25||

pumAnyOSiduta klIba AtmasambhAvanO'dhamaH| bhUtESu niranukrOzO nRpANAM tadvadhO'vadhaH||26||

tvAM stabdhAM durmadAM nItvA mAyAgAM tilazaH zaraiH| AtmayOgabalEnEmA dhArayiSyAmyahaM prajAH||27||

EvaM manyumayIM mUrtiM kRtAntamiva bibhratam| praNatA prAJjaliH prAha mahI saJjAtavEpathuH||28||

dharOvAca

namaH parasmai puruSAya mAyayA vinyastanAnAtanavE guNAtmanE| namaH svarUpAnubhavEna nirdhuta dravyakriyAkArakavibhramOrmayE||29||

yEnAhamAtmAyatanaM vinirmitA dhAtrA yatO'yaM guNasargasaGgrahaH| sa Eva mAM hantumudAyudhaH svarADupasthitO'nyaM zaraNaM kamAzrayE||30||

ya EtadAdAvasRjaccarAcaraM svamAyayAtmAzrayayAvitarkyayA| tayaiva sO'yaM kila gOptumudyataH kathaM nu mAM dharmaparO jighAMsati||31||

nUnaM batEzasya samIhitaM janaistanmAyayA durjayayAkRtAtmabhiH| na lakSyatE yastvakarOdakArayadyO'nEka EkaH paratazca IzvaraH||32||

sargAdi yO'syAnuruNaddhi zaktibhirdravyakriyAkArakacEtanAtmabhiH| tasmai samunnaddhaniruddhazaktayE namaH parasmai puruSAya vEdhasE||33||

sa vai bhavAnAtmavinirmitaM jagadbhUtEndriyAntaHkaraNAtmakaM vibhO| saMsthApayiSyannaja mAM rasAtalAdabhyujjahArAmbhasa AdisUkaraH||34||

apAmupasthE mayi nAvyavasthitAH prajA bhavAnadya rirakSiSuH kila| sa vIramUrtiH samabhUddharAdharO yO mAM payasyugrazarO jighAMsasi||35||

nUnaM janairIhitamIzvarANAmasmadvidhaistadguNasargamAyayA na jJAyatE mOhitacittavartmabhistEbhyO namO vIrayazaskarEbhyaH||36||

||iti zrImadbhAgavatE mahApurANE pAramahaMsyAM saMhitAyAM caturthaskandhE saptadazO'dhyAyaH||

See Also

• http://vedabase.net/sb/4/17/en