From StotraSamhita
< Bhagavatam | Skandha 10
paJcAzattamO'dhyAyaH
zrIzuka uvAca
astiH prAptizca kaMsasya mahiSyau bharatarSabha| mRtE bhartari duHkhArtE IyatuH sma piturgRhAn||1|| |
pitrE magadharAjAya jarAsandhAya duHkhitE| vEdayAM cakratuH sarvamAtmavaidhavyakAraNam||2|| |
sa tadapriyamAkarNya zOkAmarSayutO nRpa| ayAdavIM mahIM kartuM cakrE paramamudyamam||3|| |
akSauhiNIbhirviMzatyA tisRbhizcApi saMvRtaH| yadurAjadhAnIM mathurAM nyarudhatsarvatO dizam||4|| |
nirIkSya tadbalaM kRSNa udvElamiva sAgaram| svapuraM tEna saMruddhaM svajanaM ca bhayAkulam||5|| |
cintayAmAsa bhagavAnhariH kAraNamAnuSaH| taddEzakAlAnuguNaM svAvatAraprayOjanam||6|| |
haniSyAmi balaM hyEtadbhuvi bhAraM samAhitam| mAgadhEna samAnItaM vazyAnAM sarvabhUbhujAm||7|| |
akSauhiNIbhiH saGkhyAtaM bhaTAzvarathakuJjaraiH| mAgadhastu na hantavyO bhUyaH kartA balOdyamam||8|| |
EtadarthO'vatArO'yaM bhUbhAraharaNAya mE| saMrakSaNAya sAdhUnAM kRtO'nyESAM vadhAya ca||9|| |
anyO'pi dharmarakSAyai dEhaH saMbhriyatE mayA| virAmAyApyadharmasya kAlE prabhavataH kvacit||10|| |
EvaM dhyAyati gOvinda AkAzAtsUryavarcasau| rathAvupasthitau sadyaH sasUtau saparicchadau||11|| |
AyudhAni ca divyAni purANAni yadRcchayA| dRSTvA tAni hRSIkEzaH saGkarSaNamathAbravIt||12|| |
pazyArya vyasanaM prAptaM yadUnAM tvAvatAM prabhO| ESa tE ratha AyAtO dayitAnyAyudhAni ca||13|| |
EtadarthaM hi nau janma sAdhUnAmIza zarmakRt| trayOviMzatyanIkAkhyaM bhUmErbhAramapAkuru||14|| |
EvaM sammantrya dAzArhau daMzitau rathinau purAt| nirjagmatuH svAyudhADhyau balEnAlpIyasA vRtau||15|| |
zaGkhaM dadhmau vinirgatya harirdArukasArathiH| tatO'bhUtparasainyAnAM hRdi vitrAsavEpathuH||16|| |
tAvAha mAgadhO vIkSya hE kRSNa puruSAdhama na tvayA yOddhumicchAmi bAlEnaikEna lajjayA guptEna hi tvayA manda na yOtsyE yAhi bandhuhan||17|| |
tava rAma yadi zraddhA yudhyasva dhairyamudvaha| hitvA vA maccharaizchinnaM dEhaM svaryAhi mAM jahi||18|| |
zrIbhagavAnuvAca
na vai zUrA vikatthantE darzayantyEva pauruSam| na gRhNImO vacO rAjannAturasya mumUrSataH||19|| |
zrIzuka uvAca
jarAsutastAvabhisRtya mAdhavau mahAbalaughEna balIyasAvRnOt| sasainyayAnadhvajavAjisArathI sUryAnalau vAyurivAbhrarENubhiH||20|| |
suparNatAladhvajacihitnau rathAv alakSayantyO harirAmayOrmRdhE| striyaH purATTAlakaharmyagOpuraM samAzritAH sammumuhuH zucArditaH||21|| |
hariH parAnIkapayOmucAM muhuH zilImukhAtyulbaNavarSapIDitam| svasainyamAlOkya surAsurArcitaM vyasphUrjayacchArGgazarAsanOttamam||22|| |
gRhNannizaGgAdatha sandadhaccharAn vikRSya muJcanzitabANapUgAn| nighnanrathAnkuJjaravAjipattIn nirantaraM yadvadalAtacakram||23|| |
nirbhinnakumbhAH kariNO nipEturanEkazO'zvAH zaravRkNakandharAH| rathA hatAzvadhvajasUtanAyakAH padAyatazchinnabhujOrukandharAH||24|| |
saJchidyamAnadvipadEbhavAjinAmaGgaprasUtAH zatazO'sRgApagAH| bhujAhayaH pUruSazIrSakacchapA hatadvipadvIpahaya grahAkulAH||25|| |
karOrumInA narakEzazaivalA dhanustaraGgAyudhagulmasaGkulAH| acchUrikAvartabhayAnakA mahA maNipravEkAbharaNAzmazarkarAH||26|| |
pravartitA bhIrubhayAvahA mRdhE manasvinAM harSakarIH parasparam| vinighnatArInmuSalEna durmadAnsaGkarSaNEnAparImEyatEjasA||27|| |
balaM tadaGgArNavadurgabhairavaM durantapAraM magadhEndrapAlitam| kSayaM praNItaM vasudEvaputrayOrvikrIDitaM tajjagadIzayOH param||28|| |
sthityudbhavAntaM bhuvanatrayasya yaH samIhitE'nantaguNaH svalIlayA| na tasya citraM parapakSanigrahas tathApi martyAnuvidhasya varNyatE||29|| |
jagrAha virathaM rAmO jarAsandhaM mahAbalam| hatAnIkAvaziSTAsuM siMhaH siMhamivaujasA||30|| |
badhyamAnaM hatArAtiM pAzairvAruNamAnuSaiH| vArayAmAsa gOvindastEna kAryacikIrSayA||31|| |
sA muktO lOkanAthAbhyAM vrIDitO vIrasammataH| tapasE kRtasaGkalpO vAritaH pathi rAjabhiH||32|| |
vAkyaiH pavitrArthapadairnayanaiH prAkRtairapi| svakarmabandhaprAptO'yaM yadubhistE parAbhavaH||33|| |
hatESu sarvAnIkESu nRpO bArhadrathastadA| upEkSitO bhagavatA magadhAndurmanA yayau||34|| |
mukundO'pyakSatabalO nistIrNAribalArNavaH| vikIryamANaH kusumaistrIdazairanumOditaH||35|| |
mAthurairupasaGgamya vijvarairmuditAtmabhiH| upagIyamAnavijayaH sUtamAgadhavandibhiH||36|| |
zaGkhadundubhayO nEdurbhErItUryANyanEkazaH| vINAvENumRdaGgAni puraM pravizati prabhau||37|| |
siktamArgAM hRSTajanAM patAkAbhirabhyalaGkRtAm| nirghuSTAM brahmaghOSENa kautukAbaddhatOraNAm||38|| |
nicIyamAnO nArIbhirmAlyadadhyakSatAGkuraiH| nirIkSyamANaH sasnEhaM prItyutkalitalOcanaiH||39|| |
AyOdhanagataM vittamanantaM vIrabhUSaNam| yadurAjAya tatsarvamAhRtaM prAdizatprabhuH||40|| |
EvaM saptadazakRtvastAvatyakSauhiNIbalaH| yuyudhE mAgadhO rAjA yadubhiH kRSNapAlitaiH||41|| |
akSiNvaMstadbalaM sarvaM vRSNayaH kRSNatEjasA| hatESu svESvanIkESu tyaktO'gAdaribhirnRpaH||42|| |
aSTAdazama saGgrAma AgAmini tadantarA| nAradaprESitO vIrO yavanaH pratyadRzyata||43|| |
rurOdha mathurAmEtya tisRbhirmlEcchakOTibhiH| nRlOkE cApratidvandvO vRSNInzrutvAtmasammitAn||44|| |
taM dRSTvAcintayatkRSNaH saGkarSaNa sahAyavAn| ahO yadUnAM vRjinaM prAptaM hyubhayatO mahat||45|| |
yavanO'yaM nirundhE'smAnadya tAvanmahAbalaH| mAgadhO'pyadya vA zvO vA parazvO vAgamiSyati||46|| |
AvayOH yudhyatOrasya yadyAgantA jarAsutaH| bandhUnhaniSyatyatha vA nESyatE svapuraM balI||47|| |
tasmAdadya vidhAsyAmO durgaM dvipadadurgamam| tatra jJAtInsamAdhAya yavanaM ghAtayAmahE||48|| |
iti sammantrya bhagavAndurgaM dvAdazayOjanam| antaHsamudrE nagaraM kRtsnAdbhutamacIkarat||49|| |
dRzyatE yatra hi tvASTraM vijJAnaM zilpanaipuNam| rathyAcatvaravIthIbhiryathAvAstu vinirmitam||50|| |
suradrumalatOdyAna vicitrOpavanAnvitam| hEmazRGgairdivispRgbhiH sphaTikATTAlagOpuraiH||51|| |
rAjatArakuTaiH kOSThairhEmakumbhairalaGkRtaiH| ratnakUtairgRhairhEmairmahAmArakatasthalaiH||52|| |
vAstOSpatInAM ca gRhairvallabhIbhizca nirmitam| cAturvarNyajanAkIrNaM yadudEvagRhOllasat||53|| |
sudharmAM pArijAtaM ca mahEndraH prAhiNOddharEH| yatra cAvasthitO martyO martyadharmairna yujyatE||54|| |
zyAmaikavarNAnvaruNO hayAnzuklAnmanOjavAn| aSTau nidhipatiH kOzAnlOkapAlO nijOdayAn||55|| |
yadyadbhagavatA dattamAdhipatyaM svasiddhayE| sarvaM pratyarpayAmAsurharau bhUmigatE nRpa||56|| |
tatra yOgaprabhAvEna nItvA sarvajanaM hariH prajApAlEna rAmENa kRSNaH samanumantritaH nirjagAma puradvArAtpadmamAlI nirAyudhaH||57|| |
||iti zrImadbhAgavatE mahApurANE pAramahaMsyAM saMhitAyAM dazamaskandhE uttarArdhE paJcAzattamO'dhyAyaH||
