From StotraSamhita
< Bhagavatam | Skandha 02
zrIzuka uvAca
AtmamAyAmRtE rAjanparasyAnubhavAtmanaH| na ghaTEtArthasambandhaH svapnadraSTurivAJjasA||1|| |
bahurUpa ivAbhAti mAyayA bahurUpayA| ramamANO guNESvasyA mamAhamiti manyatE||2|| |
yarhi vAva mahimni svE parasminkAlamAyayOH| ramEta gatasammOhastyaktvOdAstE tadObhayam||3|| |
AtmatattvavizuddhyarthaM yadAha bhagavAnRtam| brahmaNE darzayanrUpamavyalIkavratAdRtaH||4|| |
sa AdidEvO jagatAM parO guruH svadhiSNyamAsthAya sisRkSayaikSata| tAM nAdhyagacchaddRzamatra sammatAM prapaJcanirmANavidhiryayA bhavEt||5|| |
sa cintayandvyakSaramEkadAmbhasyupAzRNOddvirgaditaM vacO vibhuH| sparzESu yatSODazamEkaviMzaM niSkiJcanAnAM nRpa yaddhanaM viduH||6|| |
nizamya tadvaktRdidRkSayA dizO vilOkya tatrAnyadapazyamAnaH| svadhiSNyamAsthAya vimRzya taddhitaM tapasyupAdiSTa ivAdadhE manaH||7|| |
divyaM sahasrAbdamamOghadarzanO jitAnilAtmA vijitObhayEndriyaH| atapyata smAkhilalOkatApanaM tapastapIyAMstapatAM samAhitaH||8|| |
tasmai svalOkaM bhagavAnsabhAjitaH sandarzayAmAsa paraM na yatparam| vyapEtasaGklEzavimOhasAdhvasaM svadRSTavadbhirpuruSairabhiSTutam||9|| |
pravartatE yatra rajastamastayOH sattvaM ca mizraM na ca kAlavikramaH| na yatra mAyA kimutAparE harEranuvratA yatra surAsurArcitAH||10|| |
zyAmAvadAtAH zatapatralOcanAH pizaGgavastrAH surucaH supEzasaH sarvE caturbAhava unmiSanmaNi pravEkaniSkAbharaNAH suvarcasaH pravAlavaidUryamRNAlavarcasaH parisphuratkuNDalamaulimAlinaH||11|| |
bhrAjiSNubhiryaH paritO virAjatE lasadvimAnAvalibhirmahAtmanAm| vidyOtamAnaH pramadOttamAdyubhiH savidyudabhrAvalibhiryathA nabhaH||12|| |
zrIryatra rUpiNyurugAyapAdayOH karOti mAnaM bahudhA vibhUtibhiH| prEGkhaM zritA yA kusumAkarAnugairvigIyamAnA priyakarma gAyatI||13|| |
dadarza tatrAkhilasAtvatAM patiM zriyaH patiM yajJapatiM jagatpatim| sunandanandaprabalArhaNAdibhiH svapArSadAgraiH parisEvitaM vibhum||14|| |
bhRtyaprasAdAbhimukhaM dRgAsavaM prasannahAsAruNalOcanAnanam| kirITinaM kuNDalinaM caturbhujaM pItAMzukaM vakSasi lakSitaM zriyA||15|| |
adhyarhaNIyAsanamAsthitaM paraM vRtaM catuHSODazapaJcazaktibhiH| yuktaM bhagaiH svairitaratra cAdhruvaiH sva Eva dhAmanramamANamIzvaram||16|| |
taddarzanAhlAdapariplutAntarO hRSyattanuH prEmabharAzrulOcanaH| nanAma pAdAmbujamasya vizvasRgyatpAramahaMsyEna pathAdhigamyatE||17|| |
taM prIyamANaM samupasthitaM kaviM prajAvisargE nijazAsanArhaNam| babhASa ISatsmitazOciSA girA priyaH priyaM prItamanAH karE spRzan||18|| |
zrIbhagavAnuvAca
tvayAhaM tOSitaH samyagvEdagarbha sisRkSayA| ciraM bhRtEna tapasA dustOSaH kUTayOginAm||19|| |
varaM varaya bhadraM tE varEzaM mAbhivAJchitam| brahmaJchrEyaHparizrAmaH puMsAM maddarzanAvadhiH||20|| |
manISitAnubhAvO'yaM mama lOkAvalOkanam| yadupazrutya rahasi cakartha paramaM tapaH||21|| |
pratyAdiSTaM mayA tatra tvayi karmavimOhitE| tapO mE hRdayaM sAkSAdAtmAhaM tapasO'nagha||22|| |
sRjAmi tapasaivEdaM grasAmi tapasA punaH| bibharmi tapasA vizvaM vIryaM mE duzcaraM tapaH||23|| |
brahmOvAca
bhagavansarvabhUtAnAmadhyakSO'vasthitO guhAm| vEda hyapratiruddhEna prajJAnEna cikIrSitam||24|| |
tathApi nAthamAnasya nAtha nAthaya nAthitam| parAvarE yathA rUpEjAnIyAM tE tvarUpiNaH||25|| |
yathAtmamAyAyOgEna nAnAzaktyupabRMhitam| vilumpanvisRjangRhNanbibhradAtmAnamAtmanA||26|| |
krIDasyamOghasaGkalpa UrNanAbhiryathOrNutE| tathA tadviSayAM dhEhi manISAM mayi mAdhava||27|| |
bhagavacchikSitamahaM karavANi hyatandritaH| nEhamAnaH prajAsargaM badhyEyaM yadanugrahAt||28|| |
yAvatsakhA sakhyurivEza tE kRtaH prajAvisargE vibhajAmi bhO janam| aviklavastE parikarmaNi sthitO mA mE samunnaddhamadO Jja mAninaH||29|| |
zrIbhagavAnuvAca
jJAnaM paramaguhyaM mE yadvijJAnasamanvitam| sarahasyaM tadaGgaM ca gRhANa gaditaM mayA||30|| |
yAvAnahaM yathAbhAvO yadrUpaguNakarmakaH| tathaiva tattvavijJAnamastu tE madanugrahAt||31|| |
ahamEvAsamEvAgrE nAnyadyatsadasatparam| pazcAdahaM yadEtacca yO'vaziSyEta sO'smyaham||32|| |
RtE'rthaM yatpratIyEta na pratIyEta cAtmani| tadvidyAdAtmanO mAyAM yathAbhAsO yathA tamaH||33|| |
yathA mahAnti bhUtAni bhUtESUccAvacESvanu| praviSTAnyapraviSTAni tathA tESu na tESvaham||34|| |
EtAvadEva jijJAsyaM tattvajijJAsunAtmanaH| anvayavyatirEkAbhyAM yatsyAtsarvatra sarvadA||35|| |
EtanmataM samAtiSTha paramENa samAdhinA| bhavAnkalpavikalpESu na vimuhyati karhicit||36|| |
zrIzuka uvAca
sampradizyaivamajanO janAnAM paramESThinam| pazyatastasya tadrUpamAtmanO nyaruNaddhariH||37|| |
antarhitEndriyArthAya harayE vihitAJjaliH| sarvabhUtamayO vizvaM sasarjEdaM sa pUrvavat||38|| |
prajApatirdharmapatirEkadA niyamAnyamAn| bhadraM prajAnAmanvicchannAtiSThatsvArthakAmyayA||39|| |
taM nAradaH priyatamO rikthAdAnAmanuvrataH| zuzrUSamANaH zIlEna prazrayENa damEna ca||40|| |
mAyAM vividiSanviSNOrmAyEzasya mahAmuniH| mahAbhAgavatO rAjanpitaraM paryatOSayat||41|| |
tuSTaM nizAmya pitaraM lOkAnAM prapitAmaham| dEvarSiH paripapraccha bhavAnyanmAnupRcchati||42|| |
tasmA idaM bhAgavataM purANaM dazalakSaNam| prOktaM bhagavatA prAha prItaH putrAya bhUtakRt||43|| |
nAradaH prAha munayE sarasvatyAstaTE nRpa| dhyAyatE brahma paramaM vyAsAyAmitatEjasE||44|| |
yadutAhaM tvayA pRSTO vairAjAtpuruSAdidam yathAsIttadupAkhyAstE praznAnanyAMzca kRtsnazaH||45|| |
||iti zrImadbhAgavatE mahApurANE pAramahaMsyAM saMhitAyAM dwitIyaskandhE navamO'dhyAyaH||
