Jump to: navigation, search

saptadazO'dhyAyaH

maitrEya uvAca

nizamyAtmabhuvA gItaM kAraNaM zaGkayOjjhitAH|
tataH sarvE nyavartanta tridivAya divaukasaH||1||

ditistu bharturAdEzAdapatyaparizaGkinI|
pUrNE varSazatE sAdhvI putrau prasuSuvE yamau||2||

utpAtA bahavastatra nipEturjAyamAnayOH|
divi bhuvyantarikSE ca lOkasyOrubhayAvahAH||3||

sahAcalA bhuvazcElurdizaH sarvAH prajajvaluH|
sOlkAzcAzanayaH pEtuH kEtavazcArtihEtavaH||4||

vavau vAyuH suduHsparzaH phUtkArAnIrayanmuhuH|
unmUlayannagapatInvAtyAnIkO rajOdhvajaH||5||

uddhasattaDidambhOda ghaTayA naSTabhAgaNE|
vyOmni praviSTatamasA na sma vyAdRzyatE padam||6||

cukrOza vimanA vArdhirudUrmiH kSubhitOdaraH|
sOdapAnAzca saritazcukSubhuH zuSkapaGkajAH||7||

muhuH paridhayO'bhUvansarAhvOH zazisUryayOH|
nirghAtA rathanirhrAdA vivarEbhyaH prajajJirE||8||

antargrAmESu mukhatO vamantyO vahnimulbaNam|
sRgAlOlUkaTaGkAraiH praNEdurazivaM zivAH||9||

saGgItavadrOdanavadunnamayya zirOdharAm|
vyamuJcanvividhA vAcO grAmasiMhAstatastataH||10||

kharAzca karkazaiH kSattaH khurairghnantO dharAtalam|
khArkArarabhasA mattAH paryadhAvanvarUthazaH||11||

rudantO rAsabhatrastA nIDAdudapatankhagAH|
ghOSE'raNyE ca pazavaH zakRnmUtramakurvata||12||

gAvO'trasannasRgdOhAstOyadAH pUyavarSiNaH|
vyarudandEvaliGgAni drumAH pEturvinAnilam||13||

grahAnpuNyatamAnanyE bhagaNAMzcApi dIpitAH|
aticErurvakragatyA yuyudhuzca parasparam||14||

dRSTvAnyAMzca mahOtpAtAnatattattvavidaH prajAH|
brahmaputrAnRtE bhItA mEnirE vizvasamplavam||15||

tAvAdidaityau sahasA vyajyamAnAtmapauruSau|
vavRdhAtE'zmasArENa kAyEnAdripatI iva||16||

divispRzau hEmakirITakOTibhirniruddhakASThau sphuradaGgadAbhujau|
gAM kampayantau caraNaiH padE padE kaTyA sukAJcyArkamatItya tasthatuH||17||

prajApatirnAma tayOrakArSIdyaH prAksvadEhAdyamayOrajAyata|
taM vai hiraNyakazipuM viduH prajA yaM taM hiraNyAkSamasUta sAgrataH||18||

cakrE hiraNyakazipurdOrbhyAM brahmavarENa ca|
vazE sapAlAnlOkAMstrInakutOmRtyuruddhataH||19||

hiraNyAkSO'nujastasya priyaH prItikRdanvaham|
gadApANirdivaM yAtO yuyutsurmRgayanraNam||20||

taM vIkSya duHsahajavaM raNatkAJcananUpuram|
vaijayantyA srajA juSTamaMsanyastamahAgadam||21||

manOvIryavarOtsiktamasRNyamakutObhayam|
bhItA nililyirE dEvAstArkSyatrastA ivAhayaH||22||

sa vai tirOhitAndRSTvA mahasA svEna daityarAT|
sEndrAndEvagaNAnkSIbAnapazyanvyanadadbhRzam||23||

tatO nivRttaH krIDiSyangambhIraM bhImanisvanam|
vijagAhE mahAsattvO vArdhiM matta iva dvipaH||24||

tasminpraviSTE varuNasya sainikA yAdOgaNAH sannadhiyaH sasAdhvasAH|
ahanyamAnA api tasya varcasA pradharSitA dUrataraM pradudruvuH||25||

sa varSapUgAnudadhau mahAbalazcaranmahOrmIJchvasanEritAnmuhuH|
maurvyAbhijaghnE gadayA vibhAvarImAsEdivAMstAta purIM pracEtasaH||26||

tatrOpalabhyAsuralOkapAlakaM yAdOgaNAnAmRSabhaM pracEtasam|
smayanpralabdhuM praNipatya nIcavajjagAda mE dEhyadhirAja saMyugam||27||

tvaM lOkapAlO'dhipatirbRhacchravA vIryApahO durmadavIramAninAm|
vijitya lOkE'khiladaityadAnavAnyadrAjasUyEna purAyajatprabhO||28||

sa EvamutsiktamadEna vidviSA dRDhaM pralabdhO bhagavAnapAM patiH|
rOSaM samutthaM zamayansvayA dhiyA vyavOcadaGgOpazamaM gatA vayam||29||

pazyAmi nAnyaM puruSAtpurAtanAdyaH saMyugE tvAM raNamArgakOvidam|
ArAdhayiSyatyasurarSabhEhi taM manasvinO yaM gRNatE bhavAdRzAH||30||

taM vIramArAdabhipadya vismayaH zayiSyasE vIrazayE zvabhirvRtaH
yastvadvidhAnAmasatAM prazAntayE rUpANi dhattE sadanugrahEcchayA||31||

||iti zrImadbhAgavatE mahApurANE pAramahaMsyAM saMhitAyAM tRtIyaskandhE saptadazO'dhyAyaH||

See Also