From StotraSamhita

paJcamO'dhyAyaH

sUta uvAca

atha taM sukhamAsIna upAsInaM bRhacchravAH| dEvarSiH prAha viprarSiM vINApANiH smayanniva||1||

nArada uvAca

pArAzarya mahAbhAga bhavataH kaccidAtmanA| parituSyati zArIra AtmA mAnasa Eva vA||2||

jijJAsitaM susampannamapi tE mahadadbhutam| kRtavAnbhArataM yastvaM sarvArthaparibRMhitam||3||

jijJAsitamadhItaM ca brahma yattatsanAtanam| tathApi zOcasyAtmAnamakRtArtha iva prabhO||4||

vyAsa uvAca

astyEva mE sarvamidaM tvayOktaM tathApi nAtmA parituSyatE mE| tanmUlamavyaktamagAdhabOdhaM pRcchAmahE tvAtmabhavAtmabhUtam||5||

sa vai bhavAnvEda samastaguhyamupAsitO yatpuruSaH purANaH| parAvarEzO manasaiva vizvaM sRjatyavatyatti guNairasaGgaH||6||

tvaM paryaTannarka iva trilOkImantazcarO vAyurivAtmasAkSI| parAvarE brahmaNi dharmatO vrataiH snAtasya mE nyUnamalaM vicakSva||7||

zrInArada uvAca

bhavatAnuditaprAyaM yazO bhagavatO'malam| yEnaivAsau na tuSyEta manyE taddarzanaM khilam||8||

yathA dharmAdayazcArthA munivaryAnukIrtitAH| na tathA vAsudEvasya mahimA hyanuvarNitaH||9||

na yadvacazcitrapadaM harEryazO jagatpavitraM pragRNIta karhicit| tadvAyasaM tIrthamuzanti mAnasA na yatra haMsA niramantyuzikkSayAH||10||

tadvAgvisargO janatAghaviplavO yasminpratizlOkamabaddhavatyapi| nAmAnyanantasya yazO'GkitAni yatzRNvanti gAyanti gRNanti sAdhavaH||11||

naiSkarmyamapyacyutabhAvavarjitaM na zObhatE jJAnamalaM niraJjanam| kutaH punaH zazvadabhadramIzvarE na cArpitaM karma yadapyakAraNam||12||

athO mahAbhAga bhavAnamOghadRkSucizravAH satyaratO dhRtavrataH| urukramasyAkhilabandhamuktayE samAdhinAnusmara tadvicESTitam||13||

tatO'nyathA kiJcana yadvivakSataH pRthagdRzastatkRtarUpanAmabhiH| na karhicitkvApi ca duHsthitA matirlabhEta vAtAhatanaurivAspadam||14||

jugupsitaM dharmakRtE'nuzAsataH svabhAvaraktasya mahAnvyatikramaH| yadvAkyatO dharma itItaraH sthitO na manyatE tasya nivAraNaM janaH||15||

vicakSaNO'syArhati vEdituM vibhOranantapArasya nivRttitaH sukham| pravartamAnasya guNairanAtmanastatO bhavAndarzaya cESTitaM vibhOH||16||

tyaktvA svadharmaM caraNAmbujaM harErbhajannapakvO'tha patEttatO yadi| yatra kva vAbhadramabhUdamuSya kiM kO vArtha AptO'bhajatAM svadharmataH||17||

tasyaiva hEtOH prayatEta kOvidO na labhyatE yadbhramatAmuparyadhaH| tallabhyatE duHkhavadanyataH sukhaM kAlEna sarvatra gabhIraraMhasA||18||

na vai janO jAtu kathaJcanAvrajEnmukundasEvyanyavadaGga saMsRtim| smaranmukundAGghryupagUhanaM punarvihAtumicchEnna rasagrahO janaH||19||

idaM hi vizvaM bhagavAnivEtarO yatO jagatsthAnanirOdhasambhavAH| taddhi svayaM vEda bhavAMstathApi tE prAdEzamAtraM bhavataH pradarzitam||20||

tvamAtmanAtmAnamavEhyamOghadRkparasya puMsaH paramAtmanaH kalAm| ajaM prajAtaM jagataH zivAya tanmahAnubhAvAbhyudayO'dhigaNyatAm||21||

idaM hi puMsastapasaH zrutasya vA sviSTasya sUktasya ca buddhidattayOH| avicyutO'rthaH kavibhirnirUpitO yaduttamazlOkaguNAnuvarNanam||22||

ahaM purAtItabhavE'bhavaM munE dAsyAstu kasyAzcana vEdavAdinAm| nirUpitO bAlaka Eva yOginAM zuzrUSaNE prAvRSi nirvivikSatAm||23||

tE mayyapEtAkhilacApalE'rbhakE dAntE'dhRtakrIDanakE'nuvartini| cakruH kRpAM yadyapi tulyadarzanAH zuzrUSamANE munayO'lpabhASiNi||24||

ucchiSTalEpAnanumOditO dvijaiH sakRtsma bhuJjE tadapAstakilbiSaH| EvaM pravRttasya vizuddhacEtasastaddharma EvAtmaruciH prajAyatE||25||

tatrAnvahaM kRSNakathAH pragAyatAmanugrahENAzRNavaM manOharAH| tAH zraddhayA mE'nupadaM vizRNvataH priyazravasyaGga mamAbhavadruciH||26||

tasmiMstadA labdharucErmahAmatE priyazravasyaskhalitA matirmama| yayAhamEtatsadasatsvamAyayA pazyE mayi brahmaNi kalpitaM parE||27||

itthaM zaratprAvRSikAvRtU harErvizRNvatO mE'nusavaM yazO'malam| saGkIrtyamAnaM munibhirmahAtmabhirbhaktiH pravRttAtmarajastamOpahA||28||

tasyaivaM mE'nuraktasya prazritasya hatainasaH| zraddadhAnasya bAlasya dAntasyAnucarasya ca||29||

jJAnaM guhyatamaM yattatsAkSAdbhagavatOditam| anvavOcangamiSyantaH kRpayA dInavatsalAH||30||

yEnaivAhaM bhagavatO vAsudEvasya vEdhasaH| mAyAnubhAvamavidaM yEna gacchanti tatpadam||31||

EtatsaMsUcitaM brahmaMstApatrayacikitsitam| yadIzvarE bhagavati karma brahmaNi bhAvitam||32||

AmayO yazca bhUtAnAM jAyatE yEna suvrata| tadEva hyAmayaM dravyaM na punAti cikitsitam||33||

EvaM nRNAM kriyAyOgAH sarvE saMsRtihEtavaH| ta EvAtmavinAzAya kalpantE kalpitAH parE||34||

yadatra kriyatE karma bhagavatparitOSaNam| jJAnaM yattadadhInaM hi bhaktiyOgasamanvitam||35||

kurvANA yatra karmANi bhagavacchikSayAsakRt| gRNanti guNanAmAni kRSNasyAnusmaranti ca||36||

OM namO bhagavatE tubhyaM vAsudEvAya dhImahi| pradyumnAyAniruddhAya namaH saGkarSaNAya ca||37||

iti mUrtyabhidhAnEna mantramUrtimamUrtikam| yajatE yajJapuruSaM sa samyagdarzanaH pumAn||38||

imaM svanigamaM brahmannavEtya madanuSThitam| adAnmE jJAnamaizvaryaM svasminbhAvaM ca kEzavaH||39||

tvamapyadabhrazruta vizrutaM vibhOH samApyatE yEna vidAM bubhutsitam prAkhyAhi duHkhairmuhurarditAtmanAM saGklEzanirvANamuzanti nAnyathA||40||

||iti zrImadbhAgavatE mahApurANE pAramahaMsyAM saMhitAyAM prathamaskandhE paJcamO'dhyAyaH||

See Also

• http://vedabase.net/sb/1/5/en