From StotraSamhita

EkOnapaJcAzattamO'dhyAyaH

zrIzuka uvAca

sa gatvA hAstinapuraM pauravEndrayazO'Gkitam| dadarza tatrAmbikEyaM sabhISmaM viduraM pRthAm||1||

sahaputraM ca bAhlIkaM bhAradvAjaM sagautamam| karnaM suyOdhanaM drauNiM pANDavAnsuhRdO'parAn||2||

yathAvadupasaGgamya bandhubhirgAndinIsutaH| sampRSTastaiH suhRdvArtAM svayaM cApRcchadavyayam||3||

uvAsa katicinmAsAnrAjJO vRttavivitsayA| duSprajasyAlpasArasya khalacchandAnuvartinaH||4||

tEja OjO balaM vIryaM prazrayAdIMzca sadguNAn| prajAnurAgaM pArthESu na sahadbhizcikIRSitam||5||

kRtaM ca dhArtarASTrairyadgaradAnAdyapEzalam| Acakhyau sarvamEvAsmai pRthA vidura Eva ca||6||

pRthA tu bhrAtaraM prAptamakrUramupasRtya tam| uvAca janmanilayaM smarantyazrukalEkSaNA||7||

api smaranti naH saumya pitarau bhrAtarazca mE| bhaginyau bhrAtRputrAzca jAmayaH sakhya Eva ca||8||

bhrAtrEyO bhagavAnkRSNaH zaraNyO bhaktavatsalaH| paitRSvasrEyAnsmarati rAmazcAmburuhEkSaNaH||9||

sapatnamadhyE zOcantIM vRkAnAM hariNImiva| sAntvayiSyati mAM vAkyaiH pitRhInAMzca bAlakAn||10||

kRSNa kRSNa mahAyOginvizvAtmanvizvabhAvana| prapannAM pAhi gOvinda zizubhizcAvasIdatIm||11||

nAnyattava padAmbhOjAtpazyAmi zaraNaM nRNAm| bibhyatAM mRtyusaMsArAdIsvarasyApavargikAt||12||

namaH kRSNAya zuddhAya brahmaNE paramAtmanE| yOgEzvarAya yOgAya tvAmahaM zaraNaM gatA||13||

zrIzuka uvAca

ityanusmRtya svajanaM kRSNaM ca jagadIzvaram| prArudadduHkhitA rAjanbhavatAM prapitAmahI||14||

samaduHkhasukhO'krUrO vidurazca mahAyazAH| sAntvayAmAsatuH kuntIM tatputrOtpattihEtubhiH||15||

yAsyanrAjAnamabhyEtya viSamaM putralAlasam| avadatsuhRdAM madhyE bandhubhiH sauhRdOditam||16||

akrUra uvAca

bhO bhO vaicitravIrya tvaM kurUNAM kIrtivardhana| bhrAtaryuparatE pANDAvadhunAsanamAsthitaH||17||

dharmENa pAlayannurvIM prajAH zIlEna raJjayan| vartamAnaH samaH svESu zrEyaH kIrtimavApsyasi||18||

anyathA tvAcaraMllOkE garhitO yAsyasE tamaH| tasmAtsamatvE vartasva pANDavESvAtmajESu ca||19||

nEha cAtyantasaMvAsaH kasyacitkEnacitsaha| rAjansvEnApi dEhEna kimu jAyAtmajAdibhiH||20||

EkaH prasUyatE janturEka Eva pralIyatE| EkO'nubhuGktE sukRtamEka Eva ca duSkRtam||21||

adharmOpacitaM vittaM harantyanyE'lpamEdhasaH| sambhOjanIyApadEzairjalAnIva jalaukasaH||22||

puSNAti yAnadharmENa svabuddhyA tamapaNDitam| tE'kRtArthaM prahiNvanti prANA rAyaH sutAdayaH||23||

svayaM kilbiSamAdAya taistyaktO nArthakOvidaH| asiddhArthO vizatyandhaM svadharmavimukhastamaH||24||

tasmAllOkamimaM rAjansvapnamAyAmanOratham| vIkSyAyamyAtmanAtmAnaM samaH zAntO bhava prabhO||25||

dhRtarASTra uvAca

yathA vadati kalyANIM vAcaM dAnapatE bhavAn| tathAnayA na tRpyAmi martyaH prApya yathAmRtam||26||

tathApi sUnRtA saumya hRdi na sthIyatE calE| putrAnurAgaviSamE vidyutsaudAmanI yathA||27||

Izvarasya vidhiM kO nu vidhunOtyanyathA pumAn| bhUmErbhArAvatArAya yO'vatIrNO yadOH kulE||28||

yO durvimarzapathayA nijamAyayEdaM sRSTvA guNAnvibhajatE tadanupraviSTaH| tasmai namO duravabOdhavihAratantra saMsAracakragatayE paramEzvarAya||29||

zrIzuka uvAca

ityabhiprEtya nRpatErabhiprAyaM sa yAdavaH| suhRdbhiH samanujJAtaH punaryadupurImagAt||30||

zazaMsa rAmakRSNAbhyAM dhRtarASTravicESTitam pANdavAnprati kauravya yadarthaM prESitaH svayam||31||

||iti zrImadbhAgavatE mahApurANE pAramahaMsyAM saMhitAyAM dazamaskandhE pUrvArdhE EkOnapaJcAzattamO'dhyAyaH||

See Also

• http://vedabase.net/sb/10/49/en