saptamO'dhyAyaH

yEna yEnAvatArENa bhagavAnharirIzvaraH|
karOti karNaramyANi manOjJAni ca naH prabhO||1||

yacchRNvatO'paityaratirvitRSNA sattvaM ca zuddhyatyacirENa puMsaH|
bhaktirharau tatpuruSE ca sakhyaM tadEva hAraM vada manyasE cEt||2||

athAnyadapi kRSNasya tOkAcaritamadbhutam|
mAnuSaM lOkamAsAdya tajjAtimanurundhataH||3||

kadAcidautthAnikakautukAplavE janmarkSayOgE samavEtayOSitAm|
vAditragItadvijamantravAcakaizcakAra sUnOrabhiSEcanaM satI||4||

nandasya patnI kRtamajjanAdikaM vipraiH kRtasvastyayanaM supUjitaiH|
annAdyavAsaHsragabhISTadhEnubhiH saJjAtanidrAkSamazIzayacchanaiH||5||

autthAnikautsukyamanA manasvinI samAgatAnpUjayatI vrajaukasaH|
naivAzRNOdvai ruditaM sutasya sA rudanstanArthI caraNAvudakSipat||6||

adhaHzayAnasya zizOranO'lpaka pravAlamRdvaGghrihataM vyavartata|
vidhvastanAnArasakupyabhAjanaM vyatyastacakrAkSavibhinnakUbaram||7||

dRSTvA yazOdApramukhA vrajastriya
autthAnikE karmaNi yAH samAgatAH|
nandAdayazcAdbhutadarzanAkulAH
kathaM svayaM vai zakaTaM viparyagAt||8||

UcuravyavasitamatIngOpAngOpIzca bAlakAH|
rudatAnEna pAdEna kSiptamEtanna saMzayaH||9||

na tE zraddadhirE gOpA bAlabhASitamityuta|
apramEyaM balaM tasya bAlakasya na tE viduH||10||

rudantaM sutamAdAya yazOdA grahazaGkitA|
kRtasvastyayanaM vipraiH sUktaiH stanamapAyayat||11||

pUrvavatsthApitaM gOpairbalibhiH saparicchadam|
viprA hutvArcayAM cakrurdadhyakSatakuzAmbubhiH||12||

yE'sUyAnRtadambhErSA hiMsAmAnavivarjitAH|
na tESAM satyazIlAnAmAziSO viphalAH kRtAH||13||

iti bAlakamAdAya sAmargyajurupAkRtaiH|
jalaiH pavitrauSadhibhirabhiSicya dvijOttamaiH||14||

vAcayitvA svastyayanaM nandagOpaH samAhitaH|
hutvA cAgniM dvijAtibhyaH prAdAdannaM mahAguNam||15||

gAvaH sarvaguNOpEtA vAsaHsragrukmamAlinIH|
AtmajAbhyudayArthAya prAdAttE cAnvayuJjata||16||

viprA mantravidO yuktAstairyAH prOktAstathAziSaH|
tA niSphalA bhaviSyanti na kadAcidapi sphuTam||17||

EkadArOhamArUDhaM lAlayantI sutaM satI|
garimANaM zizOrvODhuM na sEhE girikUTavat||18||

bhUmau nidhAya taM gOpI vismitA bhArapIDitA|
mahApuruSamAdadhyau jagatAmAsa karmasu||19||

daityO nAmnA tRNAvartaH kaMsabhRtyaH praNOditaH|
cakravAtasvarUpENa jahArAsInamarbhakam||20||

gOkulaM sarvamAvRNvanmuSNaMzcakSUMSi rENubhiH|
IrayansumahAghOra zabdEna pradizO dizaH||21||

muhUrtamabhavadgOSThaM rajasA tamasAvRtam|
sutaM yazOdA nApazyattasminnyastavatI yataH||22||

nApazyatkazcanAtmAnaM paraM cApi vimOhitaH|
tRNAvartanisRSTAbhiH zarkarAbhirupadrutaH||23||

iti kharapavanacakrapAMzuvarSE sutapadavImabalAvilakSya mAtA|
atikaruNamanusmarantyazOcadbhuvi patitA mRtavatsakA yathA gauH||24||

ruditamanunizamya tatra gOpyO bhRzamanutaptadhiyO'zrupUrNamukhyaH|
ruruduranupalabhya nandasUnuM pavana upAratapAMzuvarSavEgE||25||

tRNAvartaH zAntarayO vAtyArUpadharO haran|
kRSNaM nabhOgatO gantuM nAzaknOdbhUribhArabhRt||26||

tamazmAnaM manyamAna AtmanO gurumattayA|
galE gRhIta utsraSTuM nAzaknOdadbhutArbhakam||27||

galagrahaNanizcESTO daityO nirgatalOcanaH|
avyaktarAvO nyapatatsahabAlO vyasurvrajE||28||

tamantarikSAtpatitaM zilAyAM vizIrNasarvAvayavaM karAlam|
puraM yathA rudrazarENa viddhaM striyO rudatyO dadRzuH samEtAH||29||

prAdAya mAtrE pratihRtya vismitAH kRSNaM ca tasyOrasi lambamAnam
taM svastimantaM puruSAdanItaM vihAyasA mRtyumukhAtpramuktam
gOpyazca gOpAH kila nandamukhyA labdhvA punaH prApuratIva mOdam||30||

ahO batAtyadbhutamESa rakSasA bAlO nivRttiM gamitO'bhyagAtpunaH|
hiMsraH svapApEna vihiMsitaH khalaH sAdhuH samatvEna bhayAdvimucyatE||31||

kiM nastapazcIrNamadhOkSajArcanaM
pUrtESTadattamuta bhUtasauhRdam|
yatsamparEtaH punarEva bAlakO
diSTyA svabandhUnpraNayannupasthitaH||32||

dRSTvAdbhutAni bahuzO nandagOpO bRhadvanE|
vasudEvavacO bhUyO mAnayAmAsa vismitaH||33||

EkadArbhakamAdAya svAGkamArOpya bhAminI|
prasnutaM pAyayAmAsa stanaM snEhapariplutA||34||

pItaprAyasya jananI sutasya rucirasmitam|
mukhaM lAlayatI rAjaJjRmbhatO dadRzE idam||35||

khaM rOdasI jyOtiranIkamAzAH sUryEnduvahnizvasanAmbudhIMzca|
dvIpAnnagAMstadduhitRRrvanAni bhUtAni yAni sthirajaGgamAni||36||

sA vIkSya vizvaM sahasA rAjansaJjAtavEpathuH
sammIlya mRgazAvAkSI nEtrE AsItsuvismitA||37||