From StotraSamhita
< Bhagavatam | Skandha 06
saptamO'dhyAyaH
zrIrAjOvAca
kasya hEtOH parityaktA AcAryENAtmanaH surAH| EtadAcakSva bhagavaJchiSyANAmakramaM gurau||1|| |
zrIbAdarAyaNiruvAca
indrastribhuvanaizvarya madOllaGghitasatpathaH| marudbhirvasubhI rudrairAdityairRbhubhirnRpa||2|| |
vizvEdEvaizca sAdhyaizca nAsatyAbhyAM parizritaH| siddhacAraNagandharvairmunibhirbrahmavAdibhiH||3|| |
vidyAdharApsarObhizca kinnaraiH patagOragaiH| niSEvyamANO maghavAnstUyamAnazca bhArata||4|| |
upagIyamAnO lalitamAsthAnAdhyAsanAzritaH| pANDurENAtapatrENa candramaNDalacAruNA||5|| |
yuktazcAnyaiH pAramESThyaizcAmaravyajanAdibhiH| virAjamAnaH paulamyA sahArdhAsanayA bhRzam||6|| |
sa yadA paramAcAryaM dEvAnAmAtmanazca ha| nAbhyanandata samprAptaM pratyutthAnAsanAdibhiH||7|| |
vAcaspatiM munivaraM surAsuranamaskRtam| nOccacAlAsanAdindraH pazyannapi sabhAgatam||8|| |
tatO nirgatya sahasA kavirAGgirasaH prabhuH| Ayayau svagRhaM tUSNIM vidvAnzrImadavikriyAm||9|| |
tarhyEva pratibudhyEndrO guruhElanamAtmanaH| garhayAmAsa sadasi svayamAtmAnamAtmanA||10|| |
ahO bata mayAsAdhu kRtaM vai dabhrabuddhinA| yanmayaizvaryamattEna guruH sadasi kAtkRtaH||11|| |
kO gRdhyEtpaNDitO lakSmIM tripiSTapapatErapi| yayAhamAsuraM bhAvaM nItO'dya vibudhEzvaraH||12|| |
yaH pAramESThyaM dhiSaNamadhitiSThanna kaJcana| pratyuttiSThEditi brUyurdharmaM tE na paraM viduH||13|| |
tESAM kupathadESTRRNAM patatAM tamasi hyadhaH| yE zraddadhyurvacastE vai majjantyazmaplavA iva||14|| |
athAhamamarAcAryamagAdhadhiSaNaM dvijam| prasAdayiSyE nizaThaH zIrSNA taccaraNaM spRzan||15|| |
EvaM cintayatastasya maghOnO bhagavAngRhAt| bRhaspatirgatO'dRSTAM gatimadhyAtmamAyayA||16|| |
gurOrnAdhigataH saMjJAM parIkSanbhagavAnsvarAT| dhyAyandhiyA surairyuktaH zarma nAlabhatAtmanaH||17|| |
tacchrutvaivAsurAH sarva AzrityauzanasaM matam| dEvAnpratyudyamaM cakrurdurmadA AtatAyinaH||18|| |
tairvisRSTESubhistIkSNairnirbhinnAGgOrubAhavaH| brahmANaM zaraNaM jagmuH sahEndrA natakandharAH||19|| |
tAMstathAbhyarditAnvIkSya bhagavAnAtmabhUrajaH| kRpayA parayA dEva uvAca parisAntvayan||20|| |
zrIbrahmOvAca
ahO bata surazrESThA hyabhadraM vaH kRtaM mahat| brahmiSThaM brAhmaNaM dAntamaizvaryAnnAbhyanandata||21|| |
tasyAyamanayasyAsItparEbhyO vaH parAbhavaH| prakSINEbhyaH svavairibhyaH samRddhAnAM ca yatsurAH||22|| |
maghavandviSataH pazya prakSINAngurvatikramAt sampratyupacitAnbhUyaH kAvyamArAdhya bhaktitaH AdadIrannilayanaM mamApi bhRgudEvatAH||23|| |
tripiSTapaM kiM gaNayantyabhEdya mantrA bhRgUNAmanuzikSitArthAH| na vipragOvindagavIzvarANAM bhavantyabhadrANi narEzvarANAm||24|| |
tadvizvarUpaM bhajatAzu vipraM tapasvinaM tvASTramathAtmavantam| sabhAjitO'rthAnsa vidhAsyatE vO yadi kSamiSyadhvamutAsya karma||25|| |
zrIzuka uvAca
ta EvamuditA rAjanbrahmaNA vigatajvarAH| RSiM tvASTramupavrajya pariSvajyEdamabruvan||26|| |
zrIdEvA UcuH
vayaM tE'tithayaH prAptA AzramaM bhadramastu tE| kAmaH sampAdyatAM tAta pitRRNAM samayOcitaH||27|| |
putrANAM hi parO dharmaH pitRzuzrUSaNaM satAm| api putravatAM brahmankimuta brahmacAriNAm||28|| |
AcAryO brahmaNO mUrtiH pitA mUrtiH prajApatEH| bhrAtA marutpatErmUrtirmAtA sAkSAtkSitEstanuH||29|| |
dayAyA bhaginI mUrtirdharmasyAtmAtithiH svayam| agnErabhyAgatO mUrtiH sarvabhUtAni cAtmanaH||30|| |
tasmAtpitRRNAmArtAnAmArtiM paraparAbhavam| tapasApanayaMstAta sandEzaM kartumarhasi||31|| |
vRNImahE tvOpAdhyAyaM brahmiSThaM brAhmaNaM gurum| yathAJjasA vijESyAmaH sapatnAMstava tEjasA||32|| |
na garhayanti hyarthESu yaviSThAGghryabhivAdanam| chandObhyO'nyatra na brahmanvayO jyaiSThyasya kAraNam||33|| |
zrIRSiruvAca
abhyarthitaH suragaNaiH paurahityE mahAtapAH| sa vizvarUpastAnAha prasannaH zlakSNayA girA||34|| |
zrIvizvarUpa uvAca
vigarhitaM dharmazIlairbrahmavarcaupavyayam kathaM nu madvidhO nAthA lOkEzairabhiyAcitam pratyAkhyAsyati tacchiSyaH sa Eva svArtha ucyatE||35|| |
akiJcanAnAM hi dhanaM zilOJchanaM tEnEha nirvartitasAdhusatkriyaH| kathaM vigarhyaM nu karOmyadhIzvarAH paurOdhasaM hRSyati yEna durmatiH||36|| |
tathApi na pratibrUyAM gurubhiH prArthitaM kiyat| bhavatAM prArthitaM sarvaM prANairarthaizca sAdhayE||37|| |
zrIbAdarAyaNiruvAca
tEbhya EvaM pratizrutya vizvarUpO mahAtapAH| paurahityaM vRtazcakrE paramENa samAdhinA||38|| |
suradviSAM zriyaM guptAmauzanasyApi vidyayA| AcchidyAdAnmahEndrAya vaiSNavyA vidyayA vibhuH||39|| |
yayA guptaH sahasrAkSO jigyE'suracamUrvibhuH tAM prAha sa mahEndrAya vizvarUpa udAradhIH||40|| |
||iti zrImadbhAgavatE mahApurANE pAramahaMsyAM saMhitAyAM SaSThaskandhE saptamO'dhyAyaH||
