Jump to: navigation, search

tRtIyO'dhyAyaH

maitrEya uvAca

sadA vidviSatOrEvaM kAlO vai dhriyamANayOH|
jAmAtuH zvazurasyApi sumahAnaticakramE||1||

yadAbhiSiktO dakSastu brahmaNA paramESThinA|
prajApatInAM sarvESAmAdhipatyE smayO'bhavat||2||

iSTvA sa vAjapEyEna brahmiSThAnabhibhUya ca|
bRhaspatisavaM nAma samArEbhE kratUttamam||3||

tasminbrahmarSayaH sarvE dEvarSipitRdEvatAH|
AsankRtasvastyayanAstatpatnyazca sabhartRkAH||4||

tadupazrutya nabhasi khEcarANAM prajalpatAm|
satI dAkSAyaNI dEvI pitRyajJamahOtsavam||5||

vrajantIH sarvatO digbhya upadEvavarastriyaH|
vimAnayAnAH saprESThA niSkakaNThIH suvAsasaH||6||

dRSTvA svanilayAbhyAzE lOlAkSIrmRSTakuNDalAH|
patiM bhUtapatiM dEvamautsukyAdabhyabhASata||7||

satyuvAca

prajApatEstE zvazurasya sAmprataM niryApitO yajJamahOtsavaH kila|
vayaM ca tatrAbhisarAma vAma tE yadyarthitAmI vibudhA vrajanti hi||8||

tasminbhaginyO mama bhartRbhiH svakairdhruvaM gamiSyanti suhRddidRkSavaH|
ahaM ca tasminbhavatAbhikAmayE sahOpanItaM paribarhamarhitum||9||

tatra svasRRrmE nanu bhartRsammitA mAtRSvasRRH klinnadhiyaM ca mAtaram|
drakSyE cirOtkaNThamanA maharSibhirunnIyamAnaM ca mRDAdhvaradhvajam||10||

tvayyEtadAzcaryamajAtmamAyayA vinirmitaM bhAti guNatrayAtmakam|
tathApyahaM yOSidatattvavicca tE dInA didRkSE bhava mE bhavakSitim||11||

pazya prayAntIrabhavAnyayOSitO'pyalaGkRtAH kAntasakhA varUthazaH|
yAsAM vrajadbhiH zitikaNTha maNDitaM nabhO vimAnaiH kalahaMsapANDubhiH||12||

kathaM sutAyAH pitRgEhakautukaM nizamya dEhaH suravarya nEGgatE|
anAhutA apyabhiyanti sauhRdaM bharturgurOrdEhakRtazca kEtanam||13||

tanmE prasIdEdamamartya vAJchitaM kartuM bhavAnkAruNikO batArhati|
tvayAtmanO'rdhE'hamadabhracakSuSA nirUpitA mAnugRhANa yAcitaH||14||

RSiruvAca

EvaM giritraH priyayAbhibhASitaH pratyabhyadhatta prahasansuhRtpriyaH|
saMsmAritO marmabhidaH kuvAgiSUnyAnAha kO vizvasRjAM samakSataH||15||

zrIbhagavAnuvAca

tvayOditaM zObhanamEva zObhanE anAhutA apyabhiyanti bandhuSu|
tE yadyanutpAditadOSadRSTayO balIyasAnAtmyamadEna manyunA||16||

vidyAtapOvittavapurvayaHkulaiH satAM guNaiH SaDbhirasattamEtaraiH|
smRtau hatAyAM bhRtamAnadurdRzaH stabdhA na pazyanti hi dhAma bhUyasAm||17||

naitAdRzAnAM svajanavyapEkSayA gRhAnpratIyAdanavasthitAtmanAm|
yE'bhyAgatAnvakradhiyAbhicakSatE ArOpitabhrUbhiramarSaNAkSibhiH||18||

tathAribhirna vyathatE zilImukhaiH zEtE'rditAGgO hRdayEna dUyatA|
svAnAM yathA vakradhiyAM duruktibhirdivAnizaM tapyati marmatADitaH||19||

vyaktaM tvamutkRSTagatEH prajApatEH priyAtmajAnAmasi subhru mE matA|
tathApi mAnaM na pituH prapatsyasE madAzrayAtkaH paritapyatE yataH||20||

pApacyamAnEna hRdAturEndriyaH samRddhibhiH pUruSabuddhisAkSiNAm|
akalpa ESAmadhirODhumaJjasA paraM padaM dvESTi yathAsurA harim||21||

pratyudgamaprazrayaNAbhivAdanaM vidhIyatE sAdhu mithaH sumadhyamE|
prAjJaiH parasmai puruSAya cEtasA guhAzayAyaiva na dEhamAninE||22||

sattvaM vizuddhaM vasudEvazabditaM yadIyatE tatra pumAnapAvRtaH|
sattvE ca tasminbhagavAnvAsudEvO hyadhOkSajO mE namasA vidhIyatE||23||

tattE nirIkSyO na pitApi dEhakRddakSO mama dviTtadanuvratAzca yE|
yO vizvasRgyajJagataM varOru mAmanAgasaM durvacasAkarOttiraH||24||

yadi vrajiSyasyatihAya madvacO bhadraM bhavatyA na tatO bhaviSyati
sambhAvitasya svajanAtparAbhavO yadA sa sadyO maraNAya kalpatE||25||

||iti zrImadbhAgavatE mahApurANE pAramahaMsyAM saMhitAyAM caturthaskandhE tRtIyO'dhyAyaH||

See Also