From StotraSamhita

paJcaviMzO'dhyAyaH

zrIbhagavAnuvAca

guNAnAmasammizrANAM pumAnyEna yathA bhavEt| tanmE puruSavaryEdamupadhAraya zaMsataH||1||

zamO damastitikSEkSA tapaH satyaM dayA smRtiH| tuSTistyAgO'spRhA zraddhA hrIrdayAdiH svanirvRtiH||2||

kAma IhA madastRSNA stambha AzIrbhidA sukham| madOtsAhO yazaHprItirhAsyaM vIryaM balOdyamaH||3||

krOdhO lObhO'nRtaM hiMsA yAcJA dambhaH klamaH kaliH| zOkamOhau viSAdArtI nidrAzA bhIranudyamaH||4||

sattvasya rajasazcaitAstamasazcAnupUrvazaH| vRttayO varNitaprAyAH sannipAtamathO zRNu||5||

sannipAtastvahamiti mamEtyuddhava yA matiH| vyavahAraH sannipAtO manOmAtrEndriyAsubhiH||6||

dharmE cArthE ca kAmE ca yadAsau pariniSThitaH| guNAnAM sannikarSO'yaM zraddhAratidhanAvahaH||7||

pravRttilakSaNE niSThA pumAnyarhi gRhAzramE| svadharmE cAnu tiSThEta guNAnAM samitirhi sA||8||

puruSaM sattvasaMyuktamanumIyAcchamAdibhiH| kAmAdibhI rajOyuktaM krOdhAdyaistamasA yutam||9||

yadA bhajati mAM bhaktyA nirapEkSaH svakarmabhiH| taM sattvaprakRtiM vidyAtpuruSaM striyamEva vA||10||

yadA AziSa AzAsya mAM bhajEta svakarmabhiH| taM rajaHprakRtiM vidyAthiMsAmAzAsya tAmasam||11||

sattvaM rajastama iti guNA jIvasya naiva mE| cittajA yaistu bhUtAnAM sajjamAnO nibadhyatE||12||

yadEtarau jayEtsattvaM bhAsvaraM vizadaM zivam| tadA sukhEna yujyEta dharmajJAnAdibhiH pumAn||13||

yadA jayEttamaH sattvaM rajaH saGgaM bhidA calam| tadA duHkhEna yujyEta karmaNA yazasA zriyA||14||

yadA jayEdrajaH sattvaM tamO mUDhaM layaM jaDam| yujyEta zOkamOhAbhyAM nidrayA hiMsayAzayA||15||

yadA cittaM prasIdEta indriyANAM ca nirvRtiH| dEhE'bhayaM manO'saGgaM tatsattvaM viddhi matpadam||16||

vikurvankriyayA cAdhIranivRttizca cEtasAm| gAtrAsvAsthyaM manO bhrAntaM raja EtairnizAmaya||17||

sIdaccittaM vilIyEta cEtasO grahaNE'kSamam| manO naSTaM tamO glAnistamastadupadhAraya||18||

EdhamAnE guNE sattvE dEvAnAM balamEdhatE| asurANAM ca rajasi tamasyuddhava rakSasAm||19||

sattvAjjAgaraNaM vidyAdrajasA svapnamAdizEt| prasvApaM tamasA jantOsturIyaM triSu santatam||20||

uparyupari gacchanti sattvEna brAhmaNA janAH| tamasAdhO'dha AmukhyAdrajasAntaracAriNaH||21||

sattvE pralInAH svaryAnti naralOkaM rajOlayAH| tamOlayAstu nirayaM yAnti mAmEva nirguNAH||22||

madarpaNaM niSphalaM vA sAttvikaM nijakarma tat| rAjasaM phalasaGkalpaM hiMsAprAyAdi tAmasam||23||

kaivalyaM sAttvikaM jJAnaM rajO vaikalpikaM ca yat| prAkRtaM tAmasaM jJAnaM manniSThaM nirguNaM smRtam||24||

vanaM tu sAttvikO vAsO grAmO rAjasa ucyatE| tAmasaM dyUtasadanaM mannikEtaM tu nirguNam||25||

sAttvikaH kArakO'saGgI rAgAndhO rAjasaH smRtaH| tAmasaH smRtivibhraSTO nirguNO madapAzrayaH||26||

sAttvikyAdhyAtmikI zraddhA karmazraddhA tu rAjasI| tAmasyadharmE yA zraddhA matsEvAyAM tu nirguNA||27||

pathyaM pUtamanAyastamAhAryaM sAttvikaM smRtam| rAjasaM cEndriyaprESThaM tAmasaM cArtidAzuci||28||

sAttvikaM sukhamAtmOtthaM viSayOtthaM tu rAjasam| tAmasaM mOhadainyOtthaM nirguNaM madapAzrayam||29||

dravyaM dEzaH phalaM kAlO jJAnaM karma ca kArakaH| zraddhAvasthAkRtirniSThA traiguNyaH sarva Eva hi||30||

sarvE guNamayA bhAvAH puruSAvyaktadhiSThitAH| dRSTaM zrutam anudhyAtaM buddhyA vA puruSarSabha||31||

EtAH saMsRtayaH puMsO guNakarmanibandhanAH yEnEmE nirjitAH saumya guNA jIvEna cittajAH bhaktiyOgEna manniSThO madbhAvAya prapadyatE||32||

tasmAddEhamimaM labdhvA jJAnavijJAnasambhavam| guNasaGgaM vinirdhUya mAM bhajantu vicakSaNAH||33||

niHsaGgO mAM bhajEdvidvAnapramattO jitEndriyaH| rajastamazcAbhijayEtsattvasaMsEvayA muniH||34||

sattvaM cAbhijayEdyuktO nairapEkSyENa zAntadhIH| sampadyatE guNairmuktO jIvO jIvaM vihAya mAm||35||

jIvO jIvavinirmuktO guNaizcAzayasambhavaiH mayaiva brahmaNA pUrNO na bahirnAntarazcarEt||36||

||iti zrImadbhAgavatE mahApurANE pAramahaMsyAM saMhitAyAM EkAdazaskandhE paJcaviMzO'dhyAyaH||

See Also

• http://vedabase.net/sb/11/25/en