From StotraSamhita

dwAdazO'dhyAyaH

zrIRSiruvAca

EvaM jihAsurnRpa dEhamAjau mRtyuM varaM vijayAnmanyamAnaH| zUlaM pragRhyAbhyapatatsurEndraM yathA mahApuruSaM kaiTabhO'psu||1||

tatO yugAntAgnikaThOrajihvamAvidhya zUlaM tarasAsurEndraH| kSiptvA mahEndrAya vinadya vIrO hatO'si pApEti ruSA jagAda||2||

kha ApatattadvicaladgrahOlkavannirIkSya duSprEkSyamajAtaviklavaH| vajrENa vajrI zataparvaNAcchinadbhujaM ca tasyOragarAjabhOgam||3||

chinnaikabAhuH parighENa vRtraH saMrabdha AsAdya gRhItavajram| hanau tatADEndramathAmarEbhaM vajraM ca hastAnnyapatanmaghOnaH||4||

vRtrasya karmAtimahAdbhutaM tatsurAsurAzcAraNasiddhasaGghAH| apUjayaMstatpuruhUtasaGkaTaM nirIkSya hA hEti vicukruzurbhRzam||5||

indrO na vajraM jagRhE vilajjitazcyutaM svahastAdarisannidhau punaH| tamAha vRtrO hara AttavajrO jahi svazatruM na viSAdakAlaH||6||

yuyutsatAM kutracidAtatAyinAM jayaH sadaikatra na vai parAtmanAm| vinaikamutpattilayasthitIzvaraM sarvajJamAdyaM puruSaM sanAtanam||7||

lOkAH sapAlA yasyEmE zvasanti vivazA vazE| dvijA iva zicA baddhAH sa kAla iha kAraNam||8||

OjaH sahO balaM prANamamRtaM mRtyumEva ca| tamajJAya janO hEtumAtmAnaM manyatE jaDam||9||

yathA dArumayI nArI yathA patramayO mRgaH| EvaM bhUtAni maghavannIzatantrANi viddhi bhOH||10||

puruSaH prakRtirvyaktamAtmA bhUtEndriyAzayAH| zaknuvantyasya sargAdau na vinA yadanugrahAt||11||

avidvAnEvamAtmAnaM manyatE'nIzamIzvaram| bhUtaiH sRjati bhUtAni grasatE tAni taiH svayam||12||

AyuH zrIH kIrtiraizvaryamAziSaH puruSasya yAH| bhavantyEva hi tatkAlE yathAnicchOrviparyayAH||13||

tasmAdakIrtiyazasOrjayApajayayOrapi| samaH syAtsukhaduHkhAbhyAM mRtyujIvitayOstathA||14||

sattvaM rajastama iti prakRtErnAtmanO guNAH| tatra sAkSiNamAtmAnaM yO vEda sa na badhyatE||15||

pazya mAM nirjitaM zatru vRkNAyudhabhujaM mRdhE| ghaTamAnaM yathAzakti tava prANajihIrSayA||16||

prANaglahO'yaM samara iSvakSO vAhanAsanaH| atra na jJAyatE'muSya jayO'muSya parAjayaH||17||

zrIzuka uvAca

indrO vRtravacaH zrutvA gatAlIkamapUjayat| gRhItavajraH prahasaMstamAha gatavismayaH||18||

indra uvAca

ahO dAnava siddhO'si yasya tE matirIdRzI| bhaktaH sarvAtmanAtmAnaM suhRdaM jagadIzvaram||19||

bhavAnatArSInmAyAM vai vaiSNavIM janamOhinIm| yadvihAyAsuraM bhAvaM mahApuruSatAM gataH||20||

khalvidaM mahadAzcaryaM yadrajaHprakRtEstava| vAsudEvE bhagavati sattvAtmani dRDhA matiH||21||

yasya bhaktirbhagavati harau niHzrEyasEzvarE| vikrIDatO'mRtAmbhOdhau kiM kSudraiH khAtakOdakaiH||22||

zrIzuka uvAca

iti bruvANAvanyOnyaM dharmajijJAsayA nRpa| yuyudhAtE mahAvIryAvindravRtrau yudhAmpatI||23||

Avidhya parighaM vRtraH kArSNAyasamarindamaH| indrAya prAhiNOdghOraM vAmahastEna mAriSa||24||

sa tu vRtrasya parighaM karaM ca karabhOpamam| cicchEda yugapaddEvO vajrENa zataparvaNA||25||

dOrbhyAmutkRttamUlAbhyAM babhau raktasravO'suraH| chinnapakSO yathA gOtraH khAdbhraSTO vajriNA hataH||26||

mahAprANO mahAvIryO mahAsarpa iva dvipam| kRtvAdharAM hanuM bhUmau daityO divyuttarAM hanum||27||

nabhOgambhIravaktrENa lElihOlbaNajihvayA| daMSTrAbhiH kAlakalpAbhirgrasanniva jagattrayam||28||

atimAtramahAkAya AkSipaMstarasA girIn| girirATpAdacArIva padbhyAM nirjarayanmahIm||29||

jagrAsa sa samAsAdya vajriNaM sahavAhanam vRtragrastaM tamAlOkya saprajApatayaH surAH hA kaSTamiti nirviNNAzcukruzuH samaharSayaH||30||

nigIrNO'pyasurEndrENa na mamArOdaraM gataH| mahApuruSasannaddhO yOgamAyAbalEna ca||31||

bhittvA vajrENa tatkukSiM niSkramya balabhidvibhuH| uccakarta ziraH zatrOrgirizRGgamivaujasA||32||

vajrastu tatkandharamAzuvEgaH kRntansamantAtparivartamAnaH| nyapAtayattAvadahargaNEna yO jyOtiSAmayanE vArtrahatyE||33||

tadA ca khE dundubhayO vinEdurgandharvasiddhAH samaharSisaGghAH| vArtraghnaliGgaistamabhiSTuvAnA mantrairmudA kusumairabhyavarSan||34||

vRtrasya dEhAnniSkrAntamAtmajyOtirarindama pazyatAM sarvadEvAnAmalOkaM samapadyata||35||

||iti zrImadbhAgavatE mahApurANE pAramahaMsyAM saMhitAyAM SaSThaskandhE dwAdazO'dhyAyaH||

See Also

• http://vedabase.net/sb/6/12/en