From StotraSamhita
< Bhagavatam | Skandha 10
tripaJcAzattamO'dhyAyaH
zrIzuka uvAca
vaidarbhyAH sa tu sandEzaM nizamya yadunandanaH| pragRhya pANinA pANiM prahasannidamabravIt||1|| |
zrIbhagavAnuvAca
tathAhamapi taccittO nidrAM ca na labhE nizi| vEdAhamrukmiNA dvESAnmamOdvAhO nivAritaH||2|| |
tAmAnayiSya unmathya rAjanyApasadAnmRdhE| matparAmanavadyAGgImEdhasO'gnizikhAmiva||3|| |
zrIzuka uvAca
udvAharkSaM ca vijJAya rukmiNyA madhusUdanaH| rathaH saMyujyatAmAzu dArukEtyAha sArathim||4|| |
sa cAzvaiH zaibyasugrIva mEghapuSpabalAhakaiH| yuktaM rathamupAnIya tasthau prAJjaliragrataH||5|| |
Aruhya syandanaM zaurirdvijamArOpya tUrNagaiH| AnartAdEkarAtrENa vidarbhAnagamaddhayaiH||6|| |
rAjA sa kuNDinapatiH putrasnEhavazAnugaH| zizupAlAya svAM kanyAM dAsyankarmANyakArayat||7|| |
puraM sammRSTasaMsikta mArgarathyAcatuSpatham| citradhvajapatAkAbhistOraNaiH samalaGkRtam||8|| |
sraggandhamAlyAbharaNairvirajO'mbarabhUSitaiH| juSTaM strIpuruSaiH zrImad gRhairagurudhUpitaiH||9|| |
pitRRndEvAnsamabhyarcya viprAMzca vidhivannRpa| bhOjayitvA yathAnyAyaM vAcayAmAsa maGgalam||10|| |
susnAtAM sudatIM kanyAM kRtakautukamaGgalAm| AhatAMzukayugmEna bhUSitAM bhUSaNOttamaiH||11|| |
cakruH sAmargyajurmantrairvadhvA rakSAM dvijOttamAH| purOhitO'tharvavidvai juhAva grahazAntayE||12|| |
hiraNyarUpya vAsAMsi tilAMzca guDamizritAn| prAdAddhEnUzca viprEbhyO rAjA vidhividAM varaH||13|| |
EvaM cEdipatI rAjA damaghOSaH sutAya vai| kArayAmAsa mantrajJaiH sarvamabhyudayOcitam||14|| |
madacyudbhirgajAnIkaiH syandanairhEmamAlibhiH| pattyazvasaGkulaiH sainyaiH parItaH kuNdInaM yayau||15|| |
taM vai vidarbhAdhipatiH samabhyEtyAbhipUjya ca| nivEzayAmAsa mudA kalpitAnyanivEzanE||16|| |
tatra zAlvO jarAsandhO dantavakrO vidUrathaH| AjagmuzcaidyapakSIyAH pauNDrakAdyAH sahasrazaH||17|| |
kRSNarAmadviSO yattAH kanyAM caidyAya sAdhitum| yadyAgatya harEtkRSnO rAmAdyairyadubhirvRtaH||18|| |
yOtsyAmaH saMhatAstEna iti nizcitamAnasAH| AjagmurbhUbhujaH sarvE samagrabalavAhanAH||19|| |
zrutvaitadbhagavAnrAmO vipakSIya nRpOdyamam| kRSNaM caikaM gataM hartuM kanyAM kalahazaGkitaH||20|| |
balEna mahatA sArdhaM bhrAtRsnEhapariplutaH| tvaritaH kuNDinaM prAgAdgajAzvarathapattibhiH||21|| |
bhISmakanyA varArOhA kAGkSantyAgamanaM harEH| pratyApattimapazyantI dvijasyAcintayattadA||22|| |
ahO triyAmAntarita udvAhO mE'lparAdhasaH nAgacchatyaravindAkSO nAhaM vEdmyatra kAraNam sO'pi nAvartatE'dyApi matsandEzaharO dvijaH||23|| |
api mayyanavadyAtmA dRSTvA kiJcijjugupsitam| matpANigrahaNE nUnaM nAyAti hi kRtOdyamaH||24|| |
durbhagAyA na mE dhAtA nAnukUlO mahEzvaraH| dEvI vA vimukhI gaurI rudrANI girijA satI||25|| |
EvaM cintayatI bAlA gOvindahRtamAnasA| nyamIlayata kAlajJA nEtrE cAzrukalAkulE||26|| |
EvaM vadhvAH pratIkSantyA gOvindAgamanaM nRpa| vAma UrurbhujO nEtramasphuranpriyabhASiNaH||27|| |
atha kRSNavinirdiSTaH sa Eva dvijasattamaH| antaHpuracarIM dEvIM rAjaputrImdadarza ha||28|| |
sA taM prahRSTavadanamavyagrAtmagatiM satI| AlakSya lakSaNAbhijJA samapRcchacchucismitA||29|| |
tasyA AvEdayatprAptaM zazaMsa yadunandanam| uktaM ca satyavacanamAtmOpanayanaM prati||30|| |
tamAgataM samAjJAya vaidarbhI hRSTamAnasA| na pazyantI brAhmaNAya priyamanyannanAma sA||31|| |
prAptau zrutvA svaduhiturudvAhaprEkSaNOtsukau| abhyayAttUryaghOSENa rAmakRSNau samarhaNaiH||32|| |
madhuparkamupAnIya vAsAMsi virajAMsi saH| upAyanAnyabhISTAni vidhivatsamapUjayat||33|| |
tayOrnivEzanaM zrImadupAkalpya mahAmatiH| sasainyayOH sAnugayOrAtithyaM vidadhE yathA||34|| |
EvaM rAjJAM samEtAnAM yathAvIryaM yathAvayaH| yathAbalaM yathAvittaM sarvaiH kAmaiH samarhayat||35|| |
kRSNamAgatamAkarNya vidarbhapuravAsinaH| Agatya nEtrAJjalibhiH papustanmukhapaGkajam||36|| |
asyaiva bhAryA bhavituM rukmiNyarhati nAparA| asAvapyanavadyAtmA bhaiSmyAH samucitaH patiH||37|| |
kiJcitsucaritaM yannastEna tuSTastrilOkakRt| anugRhNAtu gRhNAtu vaidarbhyAH pANimacyutaH||38|| |
EvaM prEmakalAbaddhA vadanti sma puraukasaH| kanyA cAntaHpurAtprAgAdbhaTairguptAmbikAlayam||39|| |
padbhyAM viniryayau draSTuM bhavAnyAH pAdapallavam| sA cAnudhyAyatI samyaGmukundacaraNAmbujam||40|| |
yatavAGmAtRbhiH sArdhaM sakhIbhiH parivAritA guptA rAjabhaTaiH zUraiH sannaddhairudyatAyudhaiH mRDaGgazaGkhapaNavAstUryabhEryazca jaghnirE||41|| |
nAnOpahAra balibhirvAramukhyAH sahasrazaH| sraggandhavastrAbharaNairdvijapatnyaH svalaGkRtAH||42|| |
gAyantyazca stuvantazca gAyakA vAdyavAdakAH| parivArya vadhUM jagmuH sUtamAgadhavandinaH||43|| |
AsAdya dEvIsadanaM dhautapAdakarAmbujA| upaspRzya zuciH zAntA pravivEzAmbikAntikam||44|| |
tAM vai pravayasO bAlAM vidhijJA viprayOSitaH| bhavAnIM vandayAM cakrurbhavapatnIM bhavAnvitAm||45|| |
namasyE tvAmbikE'bhIkSNaM svasantAnayutAM zivAm| bhUyAtpatirmE bhagavAnkRSNastadanumOdatAm||46|| |
adbhirgandhAkSatairdhUpairvAsaHsraGmAlya bhUSaNaiH| nAnOpahArabalibhiH pradIpAvalibhiH pRthak||47|| |
viprastriyaH patimatIstathA taiH samapUjayat| lavaNApUpatAmbUla kaNThasUtraphalEkSubhiH||48|| |
tasyai striyastAH pradaduH zESAM yuyujurAziSaH| tAbhyO dEvyai namazcakrE zESAM ca jagRhE vadhUH||49|| |
munivratamatha tyaktvA nizcakrAmAmbikAgRhAt| pragRhya pANinA bhRtyAM ratnamudrOpazObhinA||50|| |
tAM dEvamAyAmiva dhIramOhinIM sumadhyamAM kuNDalamaNDitAnanAm| zyAmAM nitambArpitaratnamEkhalAM vyaJjatstanIM kuntalazaGkitEkSaNAm||51|| |
zucismitAM bimbaphalAdharadyuti zONAyamAnadvijakundakuDmalAm| padA calantIM kalahaMsagAminIM siJjatkalAnUpuradhAmazObhinA||52|| |
vilOkya vIrA mumuhuH samAgatA yazasvinastatkRtahRcchayArditAH| yAM vIkSya tE nRpatayastadudArahAsa vrIdAvalOkahRtacEtasa ujjhitAstrAH||53|| |
pEtuH kSitau gajarathAzvagatA vimUDhA yAtrAcchalEna harayE'rpayatIM svazObhAm| saivaM zanaizcalayatI calapadmakOzau prAptiM tadA bhagavataH prasamIkSamANA||54|| |
utsArya vAmakarajairalakAnapaGgaiH prAptAnhriyaikSata nRpAndadRzE'cyutaM ca| tAM rAjakanyAM rathamArurakSatIM jahAra kRSNO dviSatAM samIkSatAm||55|| |
rathaM samArOpya suparNalakSaNaM rAjanyacakraM paribhUya mAdhavaH| tatO yayau rAmapurOgamaH zanaiH zRgAlamadhyAdiva bhAgahRddhariH||56|| |
taM mAninaH svAbhibhavaM yazaHkSayaM parE jarAsandhamukhA na sEhirE ahO dhigasmAnyaza AttadhanvanAM gOpairhRtaM kEzariNAM mRgairiva||57|| |
||iti zrImadbhAgavatE mahApurANE pAramahaMsyAM saMhitAyAM dazamaskandhE uttarArdhE tripaJcAzattamO'dhyAyaH||
