From StotraSamhita
< Bhagavatam | Skandha 10
SaTcatvAriMzO'dhyAyaH
zrIzuka uvAca
vRSNInAM pravarO mantrI kRSNasya dayitaH sakhA| ziSyO bRhaspatEH sAkSAduddhavO buddhisattamaH||1|| |
tamAha bhagavAnprESThaM bhaktamEkAntinaM kvacit| gRhItvA pANinA pANiM prapannArtiharO hariH||2|| |
gacchOddhava vrajaM saumya pitrOrnau prItimAvaha| gOpInAM madviyOgAdhiM matsandEzairvimOcaya||3|| |
tA manmanaskA tRSTprANA madarthE tyaktadaihikAH mAmEva dayitaM prESThamAtmAnaM manasA gatAH yE tyaktalOkadharmAzca madarthE tAnbibharmyaham||4|| |
mayi tAH prEyasAM prESThE dUrasthE gOkulastriyaH| smarantyO'Gga vimuhyanti virahautkaNThyavihvalAH||5|| |
dhArayantyatikRcchrENa prAyaH prANAnkathaJcana| pratyAgamanasandEzairballavyO mE madAtmikAH||6|| |
zrIzuka uvAca
ityukta uddhavO rAjansandEzaM bharturAdRtaH| AdAya rathamAruhya prayayau nandagOkulam||7|| |
prAptO nandavrajaM zrImAnnimlOcati vibhAvasau| channayAnaH pravizatAM pazUnAM khurarENubhiH||8|| |
vAsitArthE'bhiyudhyadbhirnAditaM zuzmibhirvRSaiH| dhAvantIbhizca vAsrAbhirudhObhAraiH svavatsakAn||9|| |
itastatO vilaGghadbhirgOvatsairmaNDitaM sitaiH| gOdOhazabdAbhiravaM vENUnAM niHsvanEna ca||10|| |
gAyantIbhizca karmANi zubhAni balakRSNayOH| svalaGkRtAbhirgOpIbhirgOpaizca suvirAjitam||11|| |
agnyarkAtithigOvipra pitRdEvArcanAnvitaiH| dhUpadIpaizca mAlyaizca gOpAvAsairmanOramam||12|| |
sarvataH puSpitavanaM dvijAlikulanAditam| haMsakAraNDavAkIrNaiH padmaSaNDaizca maNDitam||13|| |
tamAgataM samAgamya kRSNasyAnucaraM priyam| nandaH prItaH pariSvajya vAsudEvadhiyArcayat||14|| |
bhOjitaM paramAnnEna saMviSTaM kazipau sukham| gatazramaM paryapRcchatpAdasaMvAhanAdibhiH||15|| |
kaccidaGga mahAbhAga sakhA naH zUranandanaH| AstE kuzalyapatyAdyairyuktO muktaH suhRdvrataH||16|| |
diSTyA kaMsO hataH pApaH sAnugaH svEna pApmanA| sAdhUnAM dharmazIlAnAM yadUnAM dvESTi yaH sadA||17|| |
api smarati naH kRSNO mAtaraM suhRdaH sakhIn| gOpAnvrajaM cAtmanAthaM gAvO vRndAvanaM girim||18|| |
apyAyAsyati gOvindaH svajanAnsakRdIkSitum| tarhi drakSyAma tadvaktraM sunasaM susmitEkSaNam||19|| |
dAvAgnErvAtavarSAcca vRSasarpAcca rakSitAH| duratyayEbhyO mRtyubhyaH kRSNEna sumahAtmanA||20|| |
smaratAM kRSNavIryANi lIlApAGganirIkSitam| hasitaM bhASitaM cAGga sarvA naH zithilAH kriyAH||21|| |
saricchailavanOddEzAnmukundapadabhUSitAn| AkrIDAnIkSyamANAnAM manO yAti tadAtmatAm||22|| |
manyE kRSNaM ca rAmaM ca prAptAviha surOttamau| surANAM mahadarthAya gargasya vacanaM yathA||23|| |
kaMsaM nAgAyutaprANaM mallau gajapatiM yathA| avadhiSTAM lIlayaiva pazUniva mRgAdhipaH||24|| |
tAlatrayaM mahAsAraM dhanuryaSTimivEbharAT| babhaJjaikEna hastEna saptAhamadadhAdgirim||25|| |
pralambO dhEnukO'riSTastRNAvartO bakAdayaH| daityAH surAsurajitO hatA yEnEha lIlayA||26|| |
zrIzuka uvAca
iti saMsmRtya saMsmRtya nandaH kRSNAnuraktadhIH| atyutkaNThO'bhavattUSNIM prEmaprasaravihvalaH||27|| |
yazOdA varNyamAnAni putrasya caritAni ca| zRNvantyazrUNyavAsrAkSItsnEhasnutapayOdharA||28|| |
tayOritthaM bhagavati kRSNE nandayazOdayOH| vIkSyAnurAgaM paramaM nandamAhOddhavO mudA||29|| |
zrIuddhava uvAca
yuvAM zlAghyatamau nUnaM dEhinAmiha mAnada| nArAyaNE'khilagurau yatkRtA matirIdRzI||30|| |
Etau hi vizvasya ca bIjayOnI rAmO mukundaH puruSaH pradhAnam| anvIya bhUtESu vilakSaNasya jJAnasya cEzAta imau purANau||31|| |
yasminjanaH prANaviyOgakAlE kSanaM samAvEzya manO'vizuddham| nirhRtya karmAzayamAzu yAti parAM gatiM brahmamayO'rkavarNaH||32|| |
tasminbhavantAvakhilAtmahEtau nArAyaNE kAraNamartyamUrtau| bhAvaM vidhattAM nitarAM mahAtmankiM vAvaziSTaM yuvayOH sukRtyam||33|| |
AgamiSyatyadIrghENa kAlEna vrajamacyutaH| priyaM vidhAsyatE pitrOrbhagavAnsAtvatAM patiH||34|| |
hatvA kaMsaM raGgamadhyE pratIpaM sarvasAtvatAm| yadAha vaH samAgatya kRSNaH satyaM karOti tat||35|| |
mA khidyataM mahAbhAgau drakSyathaH kRSNamantikE| antarhRdi sa bhUtAnAmAstE jyOtirivaidhasi||36|| |
na hyasyAsti priyaH kazcinnApriyO vAstyamAninaH| nOttamO nAdhamO vApi samAnasyAsamO'pi vA||37|| |
na mAtA na pitA tasya na bhAryA na sutAdayaH| nAtmIyO na parazcApi na dEhO janma Eva ca||38|| |
na cAsya karma vA lOkE sadasanmizrayOniSu| krIDArthaM sO'pi sAdhUnAM paritrANAya kalpatE||39|| |
sattvaM rajastama iti bhajatE nirguNO guNAn| krIDannatItO'pi guNaiH sRjatyavanhantyajaH||40|| |
yathA bhramarikAdRSTyA bhrAmyatIva mahIyatE| cittE kartari tatrAtmA kartEvAhaM dhiyA smRtaH||41|| |
yuvayOrEva naivAyamAtmajO bhagavAnhariH| sarvESAmAtmajO hyAtmA pitA mAtA sa IzvaraH||42|| |
dRSTaM zrutaM bhUtabhavadbhaviSyat sthAsnuzcariSNurmahadalpakaM ca| vinAcyutAdvastu tarAM na vAcyaM sa Eva sarvaM paramAtmabhUtaH||43|| |
EvaM nizA sA bruvatOrvyatItA nandasya kRSNAnucarasya rAjan| gOpyaH samutthAya nirUpya dIpAnvAstUnsamabhyarcya daudhInyamanthun||44|| |
tA dIpadIptairmaNibhirvirEjU rajjUrvikarSadbhujakaGkaNasrajaH| calannitambastanahArakuNDala tviSatkapOlAruNakuGkumAnanAH||45|| |
udgAyatInAmaravindalOcanaM vrajAGganAnAM divamaspRzaddhvaniH| dadhnazca nirmanthanazabdamizritO nirasyatE yEna dizAmamaGgalam||46|| |
bhagavatyuditE sUryE nandadvAri vrajaukasaH| dRSTvA rathaM zAtakaumbhaM kasyAyamiti cAbruvan||47|| |
akrUra AgataH kiM vA yaH kaMsasyArthasAdhakaH| yEna nItO madhupurIM kRSNaH kamalalOcanaH||48|| |
kiM sAdhayiSyatyasmAbhirbhartuH prItasya niSkRtim tataH strINAM vadantInAmuddhavO'gAtkRtAhnikaH||49|| |
||iti zrImadbhAgavatE mahApurANE pAramahaMsyAM saMhitAyAM dazamaskandhE pUrvArdhE SaTcatvAriMzO'dhyAyaH||
