From StotraSamhita

saptatitamO'dhyAyaH

zrIzuka uvAca

athOSasyupavRttAyAM kukkuTAnkUjatO'zapan| gRhItakaNThyaH patibhirmAdhavyO virahAturAH||1||

vayAMsyarOruvankRSNaM bOdhayantIva vandinaH| gAyatsvaliSvanidrANi mandAravanavAyubhiH||2||

muhUrtaM taM tu vaidarbhI nAmRSyadatizObhanam| parirambhaNavizlESAtpriyabAhvantaraM gatA||3||

brAhmE muhUrta utthAya vAryupaspRzya mAdhavaH| dadhyau prasannakaraNa AtmAnaM tamasaH param||4||

EkaM svayaM jyOtirananyamavyayaM svasaMsthayA nityanirastakalmaSam| brahmAkhyamasyOdbhavanAzahEtubhiH svazaktibhirlakSitabhAvanirvRtim||5||

athAplutO'mbhasyamalE yathAvidhi kriyAkalApaM paridhAya vAsasI| cakAra sandhyOpagamAdi sattamO hutAnalO brahma jajApa vAgyataH||6||

upasthAyArkamudyantaM tarpayitvAtmanaH kalAH| dEvAnRSInpitRRnvRddhAnviprAnabhyarcya cAtmavAn||7||

dhEnUnAM rukmazRGgInAM sAdhvInAM mauktikasrajAm| payasvinInAM gRSTInAM savatsAnAM suvAsasAm||8||

dadau rUpyakhurAgrANAM kSaumAjinatilaiH saha| alaGkRtEbhyO viprEbhyO badvaM badvaM dinE dinE||9||

gOvipradEvatAvRddha gurUnbhUtAni sarvazaH| namaskRtyAtmasambhUtIrmaGgalAni samaspRzat||10||

AtmAnaM bhUSayAmAsa naralOkavibhUSaNam| vAsObhirbhUSaNaiH svIyairdivyasraganulEpanaiH||11||

avEkSyAjyaM tathAdarzaM gOvRSadvijadEvatAH kAmAMzca sarvavarNAnAM paurAntaHpuracAriNAm pradApya prakRtIH kAmaiH pratOSya pratyanandata||12||

saMvibhajyAgratO viprAnsraktAmbUlAnulEpanaiH| suhRdaH prakRtIrdArAnupAyuGkta tataH svayam||13||

tAvatsUta upAnIya syandanaM paramAdbhutam| sugrIvAdyairhayairyuktaM praNamyAvasthitO'grataH||14||

gRhItvA pANinA pANI sArathEstamathAruhat| sAtyakyuddhavasaMyuktaH pUrvAdrimiva bhAskaraH||15||

IkSitO'ntaHpurastrINAM savrIDaprEmavIkSitaiH| kRcchrAdvisRSTO niragAjjAtahAsO haranmanaH||16||

sudharmAkhyAM sabhAM sarvairvRSNibhiH parivAritaH| prAvizadyanniviSTAnAM na santyaGga SaDUrmayaH||17||

tatrOpavistaH paramAsanE vibhurbabhau svabhAsA kakubhO'vabhAsayan| vRtO nRsiMhairyadubhiryadUttamO yathODurAjO divi tArakAgaNaiH||18||

tatrOpamantriNO rAjannAnAhAsyarasairvibhum| upatasthurnaTAcAryA nartakyastANDavaiH pRthak||19||

mRdaGgavINAmuraja vENutAladarasvanaiH| nanRturjagustuSTuvuzca sUtamAgadhavandinaH||20||

tatrAhurbrAhmaNAH kEcidAsInA brahmavAdinaH| pUrvESAM puNyayazasAM rAjJAM cAkathayankathAH||21||

tatraikaH puruSO rAjannAgatO'pUrvadarzanaH| vijJApitO bhagavatE pratIhAraiH pravEzitaH||22||

sa namaskRtya kRSNAya parEzAya kRtAJjaliH| rAjJAmAvEdayadduHkhaM jarAsandhanirOdhajam||23||

yE ca digvijayE tasya sannatiM na yayurnRpAH| prasahya ruddhAstEnAsannayutE dvE girivrajE||24||

rAjAna UcuH

kRSNa kRSNApramEyAtmanprapannabhayabhaJjana| vayaM tvAM zaraNaM yAmO bhavabhItAH pRthagdhiyaH||25||

lOkO vikarmanirataH kuzalE pramattaH karmaNyayaM tvaduditE bhavadarcanE svE| yastAvadasya balavAniha jIvitAzAM sadyazchinattyanimiSAya namO'stu tasmai||26||

lOkE bhavAJjagadinaH kalayAvatIrNaH sadrakSaNAya khalanigrahaNAya cAnyaH| kazcittvadIyamatiyAti nidEzamIza kiM vA janaH svakRtamRcchati tanna vidmaH||27||

svapnAyitaM nRpasukhaM paratantramIza zazvadbhayEna mRtakEna dhuraM vahAmaH| hitvA tadAtmani sukhaM tvadanIhalabhyaM klizyAmahE'tikRpaNAstava mAyayEha||28||

tannO bhavAnpraNatazOkaharAGghriyugmO baddhAnviyuGkSva magadhAhvayakarmapAzAt| yO bhUbhujO'yutamataGgajavIryamEkO bibhradrurOdha bhavanE mRgarADivAvIH||29||

yO vai tvayA dvinavakRtva udAttacakra bhagnO mRdhE khalu bhavantamanantavIryam| jitvA nRlOkanirataM sakRdUDhadarpO yuSmatprajA rujati nO'jita tadvidhEhi||30||

dUta uvAca

iti mAgadhasaMruddhA bhavaddarzanakaGkSiNaH| prapannAH pAdamUlaM tE dInAnAM zaM vidhIyatAm||31||

zrIzuka uvAca

rAjadUtE bruvatyEvaM dEvarSiH paramadyutiH| bibhratpiGgajaTAbhAraM prAdurAsIdyathA raviH||32||

taM dRSTvA bhagavAnkRSNaH sarvalOkEzvarEzvaraH| vavanda utthitaH zIrSNA sasabhyaH sAnugO mudA||33||

sabhAjayitvA vidhivatkRtAsanaparigraham| babhASE sunRtairvAkyaiH zraddhayA tarpayanmunim||34||

api svidadya lOkAnAM trayANAmakutObhayam| nanu bhUyAnbhagavatO lOkAnparyaTatO guNaH||35||

na hi tE'viditaM kiJcillOkESvIzvarakartRSu| atha pRcchAmahE yuSmAnpANDavAnAM cikIrSitam||36||

zrInArada uvAca

dRSTA mAyA tE bahuzO duratyayA mAyA vibhO vizvasRjazca mAyinaH| bhUtESu bhUmaMzcarataH svazaktibhirvahnEriva cchannarucO na mE'dbhutam||37||

tavEhitaM kO'rhati sAdhu vEdituM svamAyayEdaM sRjatO niyacchataH| yadvidyamAnAtmatayAvabhAsatE tasmai namastE svavilakSaNAtmanE||38||

jIvasya yaH saMsaratO vimOkSaNaM na jAnatO'narthavahAccharIrataH| lIlAvatAraiH svayazaH pradIpakaM prAjvAlayattvA tamahaM prapadyE||39||

athApyAzrAvayE brahma naralOkaviDambanam| rAjJaH paitRSvasrEyasya bhaktasya ca cikIrSitam||40||

yakSyati tvAM makhEndrENa rAjasUyEna pANDavaH| pAramESThyakAmO nRpatistadbhavAnanumOdatAm||41||

tasmindEva kratuvarE bhavantaM vai surAdayaH| didRkSavaH samESyanti rAjAnazca yazasvinaH||42||

zravaNAtkIrtanAddhyAnAtpUyantE'ntEvasAyinaH| tava brahmamayasyEza kimutEkSAbhimarzinaH||43||

yasyAmalaM divi yazaH prathitaM rasAyAM bhUmau ca tE bhuvanamaGgala digvitAnam| mandAkinIti divi bhOgavatIti cAdhO gaGgEti cEha caraNAmbu punAti vizvam||44||

zrIzuka uvAca

tatra tESvAtmapakSESva gRNatsu vijigISayA| vAcaH pEzaiH smayanbhRtyamuddhavaM prAha kEzavaH||45||

zrIbhagavAnuvAca

tvaM hi naH paramaM cakSuH suhRnmantrArthatattvavit| athAtra brUhyanuSThEyaM zraddadhmaH karavAma tat||46||

ityupAmantritO bhartrA sarvajJEnApi mugdhavat nidEzaM zirasAdhAya uddhavaH pratyabhASata||47||

||iti zrImadbhAgavatE mahApurANE pAramahaMsyAM saMhitAyAM dazamaskandhE uttarArdhE saptatitamO'dhyAyaH||

See Also

• http://vedabase.net/sb/10/70/en