From StotraSamhita
< Bhagavatam | Skandha 10
saptacatvAriMzO'dhyAyaH
zrIzuka uvAca
taM vIkSya kRSAnucaraM vrajastriyaH pralambabAhuM navakaJjalOcanam| pItAmbaraM puSkaramAlinaM lasan mukhAravindaM parimRSTakuNDalam||1|| |
suvismitAH kO'yamapIvyadarzanaH kutazca kasyAcyutavESabhUSaNaH| iti sma sarvAH parivavrurutsukAs tamuttamaHzlOkapadAmbujAzrayam||2|| |
taM prazrayENAvanatAH susatkRtaM savrIDahAsEkSaNasUnRtAdibhiH| rahasyapRcchannupaviSTamAsanE vijJAya sandEzaharaM ramApatEH||3|| |
jAnImastvAM yadupatEH pArSadaM samupAgatam| bhartrEha prESitaH pitrOrbhavAnpriyacikIrSayA||4|| |
anyathA gOvrajE tasya smaraNIyaM na cakSmahE| snEhAnubandhO bandhUnAM munErapi sudustyajaH||5|| |
anyESvarthakRtA maitrI yAvadarthaviDambanam| pumbhiH strISu kRtA yadvatsumanaHsviva SaTpadaiH||6|| |
niHsvaM tyajanti gaNikA akalpaM nRpatiM prajAH| adhItavidyA AcAryamRtvijO dattadakSiNam||7|| |
khagA vItaphalaM vRkSaM bhuktvA cAtithayO gRham| dagdhaM mRgAstathAraNyaM jArA bhuktvA ratAM striyam||8|| |
iti gOpyO hi gOvindE gatavAkkAyamAnasAH| kRSNadUtE samAyAtE uddhavE tyaktalaukikAH||9|| |
gAyantyaH prIyakarmANi rudantyazca gatahriyaH| tasya saMsmRtya saMsmRtya yAni kaizOrabAlyayOH||10|| |
kAcinmadhukaraM dRSTvA dhyAyantI kRSNasaGgamam| priyaprasthApitaM dUtaM kalpayitvEdamabravIt||11|| |
gOpyuvAca
madhupa kitavabandhO mA spRzaGghriM sapatnyAH kucavilulitamAlAkuGkumazmazrubhirnaH| vahatu madhupatistanmAninInAM prasAdaM yadusadasi viDambyaM yasya dUtastvamIdRk||12|| |
sakRdadharasudhAM svAM mOhinIM pAyayitvA sumanasa iva sadyastatyajE'smAnbhavAdRk| paricarati kathaM tatpAdapadmaM nu padmA hyapi bata hRtacEtA hyuttamaHzlOkajalpaiH||13|| |
kimiha bahu SaDaGghrE gAyasi tvaM yadUnAm adhipatimagRhANAmagratO naH purANam| vijayasakhasakhInAM gIyatAM tatprasaGgaH kSapitakucarujastE kalpayantISTamiSTAH||14|| |
divi bhuvi ca rasAyAM kAH striyastaddurApAH kapaTarucirahAsabhrUvijRmbhasya yAH syuH| caraNaraja upAstE yasya bhUtirvayaM kA api ca kRpaNapakSE hyuttamaHzlOkazabdaH||15|| |
visRja zirasi pAdaM vEdmyahaM cAtukArair anunayaviduSastE'bhyEtya dautyairmukundAt| svakRta iha viSRSTApatyapatyanyalOkA vyasRjadakRtacEtAH kiM nu sandhEyamasmin||16|| |
mRgayuriva kapIndraM vivyadhE lubdhadharmA striyamakRta virUpAM strIjitaH kAmayAnAm| balimapi balimattvAvESTayaddhvAGkSavadyas tadalamasitasakhyairdustyajastatkathArthaH||17|| |
yadanucaritalIlAkarNapIyUSavipruT sakRdadanavidhUtadvandvadharmA vinaSTAH| sapadi gRhakuTumbaM dInamutsRjya dInA bahava iha vihaGgA bhikSucaryAM caranti||18|| |
vayamRtamiva jihmavyAhRtaM zraddadhAnAH kulikarutamivAjJAH kRSNavadhvO hariNyaH| dadRzurasakRdEtattannakhasparzatIvra smararuja upamantrinbhaNyatAmanyavArtA||19|| |
priyasakha punarAgAH prEyasA prESitaH kiM varaya kimanurundhE mAnanIyO'si mE'Gga| nayasi kathamihAsmAndustyajadvandvapArzvaM satatamurasi saumya zrIrvadhUH sAkamAstE||20|| |
api bata madhupuryAmAryaputrO'dhunAstE smarati sa pitRgEhAnsaumya bandhUMzca gOpAn| kvacidapi sa kathA naH kiGkarINAM gRNItE bhujamagurusugandhaM mUrdhnyadhAsyatkadA nu||21|| |
zrIzuka uvAca
athOddhavO nizamyaivaM kRSNadarzanalAlasAH| sAntvayanpriyasandEzairgOpIridamabhASata||22|| |
zrIuddhava uvAca
ahO yUyaM sma pUrNArthA bhavatyO lOkapUjitAH| vAsudEvE bhagavati yAsAmityarpitaM manaH||23|| |
dAnavratatapOhOma japasvAdhyAyasaMyamaiH| zrEyObhirvividhaizcAnyaiH kRSNE bhaktirhi sAdhyatE||24|| |
bhagavatyuttamaHzlOkE bhavatIbhiranuttamA| bhaktiH pravartitA diSTyA munInAmapi durlabhA||25|| |
diSTyA putrAnpatIndEhAnsvajanAnbhavanAni ca| hitvAvRnIta yUyaM yatkRSNAkhyaM puruSaM param||26|| |
sarvAtmabhAvO'dhikRtO bhavatInAmadhOkSajE| virahENa mahAbhAgA mahAnmE'nugrahaH kRtaH||27|| |
zrUyatAM priyasandEzO bhavatInAM sukhAvahaH| yamAdAyAgatO bhadrA ahaM bhartU rahaskaraH||28|| |
zrIbhagavAnuvAca
bhavatInAM viyOgO mE na hi sarvAtmanA kvacit yathA bhUtAni bhUtESu khaM vAyvagnirjalaM mahI tathAhaM ca manaHprANa bhUtEndriyaguNAzrayaH||29|| |
AtmanyEvAtmanAtmAnaM sRjE hanmyanupAlayE| AtmamAyAnubhAvEna bhUtEndriyaguNAtmanA||30|| |
AtmA jJAnamayaH zuddhO vyatiriktO'guNAnvayaH| suSuptisvapnajAgradbhirmAyAvRttibhirIyatE||31|| |
yEnEndriyArthAndhyAyEta mRSA svapnavadutthitaH| tannirundhyAdindriyANi vinidraH pratyapadyata||32|| |
EtadantaH samAmnAyO yOgaH sAGkhyaM manISiNAm| tyAgastapO damaH satyaM samudrAntA ivApagAH||33|| |
yattvahaM bhavatInAM vai dUrE vartE priyO dRzAm| manasaH sannikarSArthaM madanudhyAnakAmyayA||34|| |
yathA dUracarE prESThE mana Avizya vartatE| strINAM ca na tathA cEtaH sannikRSTE'kSigOcarE||35|| |
mayyAvEzya manaH kRtsnaM vimuktAzESavRtti yat| anusmarantyO mAM nityamacirAnmAmupaiSyatha||36|| |
yA mayA krIDatA rAtryAM vanE'sminvraja AsthitAH| alabdharAsAH kalyANyO mApurmadvIryacintayA||37|| |
zrIzuka uvAca
EvaM priyatamAdiSTamAkarNya vrajayOSitaH| tA UcuruddhavaM prItAstatsandEzAgatasmRtIH||38|| |
gOpya UcuH
diSTyAhitO hataH kaMsO yadUnAM sAnugO'ghakRt| diSTyAptairlabdhasarvArthaiH kuzalyAstE'cyutO'dhunA||39|| |
kaccidgadAgrajaH saumya karOti purayOSitAm| prItiM naH snigdhasavrIDa hAsOdArEkSaNArcitaH||40|| |
kathaM rativizESajJaH priyazca purayOSitAm| nAnubadhyEta tadvAkyairvibhramaizcAnubhAjitaH||41|| |
api smarati naH sAdhO gOvindaH prastutE kvacit| gOSThimadhyE purastrINAmgrAmyAH svairakathAntarE||42|| |
tAH kiM nizAH smarati yAsu tadA priyAbhir vRndAvanE kumudakundazazAGkaramyE| rEmE kvaNaccaraNanUpurarAsagOSThyAm asmAbhirIDitamanOjJakathaH kadAcit||43|| |
apyESyatIha dAzArhastaptAH svakRtayA zucA| saJjIvayannu nO gAtrairyathEndrO vanamambudaiH||44|| |
kasmAtkRSNa ihAyAti prAptarAjyO hatAhitaH| narEndrakanyA udvAhya prItaH sarvasuhRdvRtaH||45|| |
kimasmAbhirvanaukObhiranyAbhirvA mahAtmanaH| zrIpatErAptakAmasya kriyEtArthaH kRtAtmanaH||46|| |
paraM saukhyaM hi nairAzyaM svairiNyapyAha piGgalA| tajjAnatInAM naH kRSNE tathApyAzA duratyayA||47|| |
ka utsahEta santyaktumuttamaHzlOkasaMvidam| anicchatO'pi yasya zrIraGgAnna cyavatE kvacit||48|| |
saricchailavanOddEzA gAvO vENuravA imE| saGkarSaNasahAyEna kRSNEnAcaritAH prabhO||49|| |
punaH punaH smArayanti nandagOpasutaM bata| zrInikEtaistatpadakairvismartuM naiva zaknumaH||50|| |
gatyA lalitayOdAra hAsalIlAvalOkanaiH| mAdhvyA girA hRtadhiyaH kathaM taM vismarAma hE||51|| |
hE nAtha hE ramAnAtha vrajanAthArtinAzana| magnamuddhara gOvinda gOkulaM vRjinArNavAt||52|| |
zrIzuka uvAca
tatastAH kRSNasandEzairvyapEtavirahajvarAH| uddhavaM pUjayAM cakrurjJAtvAtmAnamadhOkSajam||53|| |
uvAsa katicinmAsAngOpInAM vinudanzucaH| kRSNalIlAkathAM gAyanramayAmAsa gOkulam||54|| |
yAvantyahAni nandasya vrajE'vAtsItsa uddhavaH| vrajaukasAM kSaNaprAyANyAsankRSNasya vArtayA||55|| |
saridvanagiridrONIrvIkSankusumitAndrumAn| kRSNaM saMsmArayanrEmE haridAsO vrajaukasAm||56|| |
dRSTvaivamAdi gOpInAM kRSNAvEzAtmaviklavam| uddhavaH paramaprItastA namasyannidaM jagau||57|| |
EtAH paraM tanubhRtO bhuvi gOpavadhvO gOvinda Eva nikhilAtmani rUDhabhAvAH| vAJchanti yadbhavabhiyO munayO vayaM ca kiM brahmajanmabhiranantakathArasasya||58|| |
kvEmAH striyO vanacarIrvyabhicAraduSTAH kRSNE kva caiSa paramAtmani rUDhabhAvaH| nanvIzvarO'nubhajatO'viduSO'pi sAkSAc chrEyastanOtyagadarAja ivOpayuktaH||59|| |
nAyaM zriyO'Gga u nitAntaratEH prasAdaH svaryOSitAM nalinagandharucAM kutO'nyAH| rAsOtsavE'sya bhujadaNDagRhItakaNTha labdhAziSAM ya udagAdvrajavallabhInAm||60|| |
AsAmahO caraNarENujuSAmahaM syAM vRndAvanE kimapi gulmalatauSadhInAm| yA dustyajaM svajanamAryapathaM ca hitvA bhEjurmukundapadavIM zrutibhirvimRgyAm||61|| |
yA vai zriyArcitamajAdibhirAptakAmair yOgEzvarairapi yadAtmani rAsagOSThyAm| kRSNasya tadbhagavataH caraNAravindaM nyastaM stanESu vijahuH parirabhya tApam||62|| |
vandE nandavrajastrINAM pAdarENumabhIkSNazaH| yAsAM harikathOdgItaM punAti bhuvanatrayam||63|| |
zrIzuka uvAca
atha gOpIranujJApya yazOdAM nandamEva ca| gOpAnAmantrya dAzArhO yAsyannAruruhE ratham||64|| |
taM nirgataM samAsAdya nAnOpAyanapANayaH| nandAdayO'nurAgENa prAvOcannazrulOcanAH||65|| |
manasO vRttayO naH syuH kRSNa pAdAmbujAzrayAH| vAcO'bhidhAyinIrnAmnAM kAyastatprahvaNAdiSu||66|| |
karmabhirbhrAmyamANAnAM yatra kvApIzvarEcchayA| maGgalAcaritairdAnai ratirnaH kRSNa IzvarE||67|| |
EvaM sabhAjitO gOpaiH kRSNabhaktyA narAdhipa| uddhavaH punarAgacchanmathurAM kRSNapAlitAm||68|| |
kRSNAya praNipatyAha bhaktyudrEkaM vrajaukasAm vasudEvAya rAmAya rAjJE cOpAyanAnyadAt||69|| |
||iti zrImadbhAgavatE mahApurANE pAramahaMsyAM saMhitAyAM dazamaskandhE pUrvArdhE saptacatvAriMzO'dhyAyaH||
