From StotraSamhita
< Bhagavatam | Skandha 08
trayOviMzO'dhyAyaH
zrIzuka uvAca
ityuktavantaM puruSaM purAtanaM mahAnubhAvO'khilasAdhusammataH| baddhAJjalirbASpakalAkulEkSaNO bhaktyutkalO gadgadayA girAbravIt||1|| |
zrIbaliruvAca
ahO praNAmAya kRtaH samudyamaH prapannabhaktArthavidhau samAhitaH| yallOkapAlaistvadanugrahO'marairalabdhapUrvO'pasadE'surE'rpitaH||2|| |
zrIzuka uvAca
ityuktvA harimAnatya brahmANaM sabhavaM tataH| vivEza sutalaM prItO balirmuktaH sahAsuraiH||3|| |
EvamindrAya bhagavAnpratyAnIya triviSTapam| pUrayitvAditEH kAmamazAsatsakalaM jagat||4|| |
labdhaprasAdaM nirmuktaM pautraM vaMzadharaM balim| nizAmya bhaktipravaNaH prahlAda idamabravIt||5|| |
zrIprahlAda uvAca
nEmaM viriJcO labhatE prasAdaM na zrIrna zarvaH kimutAparE'nyE| yannO'surANAmasi durgapAlO vizvAbhivandyairabhivanditAGghriH||6|| |
yatpAdapadmamakarandaniSEvaNEna brahmAdayaH zaraNadAznuvatE vibhUtIH| kasmAdvayaM kusRtayaH khalayOnayastE dAkSiNyadRSTipadavIM bhavataH praNItAH||7|| |
citraM tavEhitamahO'mitayOgamAyA lIlAvisRSTabhuvanasya vizAradasya| sarvAtmanaH samadRzO'viSamaH svabhAvO bhaktapriyO yadasi kalpatarusvabhAvaH||8|| |
zrIbhagavAnuvAca
vatsa prahlAda bhadraM tE prayAhi sutalAlayam| mOdamAnaH svapautrENa jJAtInAM sukhamAvaha||9|| |
nityaM draSTAsi mAM tatra gadApANimavasthitam| maddarzanamahAhlAda dhvastakarmanibandhanaH||10|| |
zrIzuka uvAca
AjJAM bhagavatO rAjanprahrAdO balinA saha| bADhamityamalaprajJO mUrdhnyAdhAya kRtAJjaliH||11|| |
parikramyAdipuruSaM sarvAsuracamUpatiH| praNatastadanujJAtaH pravivEza mahAbilam||12|| |
athAhOzanasaM rAjanharirnArAyaNO'ntikE| AsInamRtvijAM madhyE sadasi brahmavAdinAm||13|| |
brahmansantanu ziSyasya karmacchidraM vitanvataH| yattatkarmasu vaiSamyaM brahmadRSTaM samaM bhavEt||14|| |
zrIzukra uvAca
kutastatkarmavaiSamyaM yasya karmEzvarO bhavAn| yajJEzO yajJapuruSaH sarvabhAvEna pUjitaH||15|| |
mantratastantratazchidraM dEzakAlArhavastutaH| sarvaM karOti nizchidramanusaGkIrtanaM tava||16|| |
tathApi vadatO bhUmankariSyAmyanuzAsanam| EtacchrEyaH paraM puMsAM yattavAjJAnupAlanam||17|| |
zrIzuka uvAca
pratinandya harErAjJAmuzanA bhagavAniti| yajJacchidraM samAdhatta balErviprarSibhiH saha||18|| |
EvaM balErmahIM rAjanbhikSitvA vAmanO hariH| dadau bhrAtrE mahEndrAya tridivaM yatparairhRtam||19|| |
prajApatipatirbrahmA dEvarSipitRbhUmipaiH| dakSabhRgvaGgirOmukhyaiH kumArENa bhavEna ca||20|| |
kazyapasyAditEH prItyai sarvabhUtabhavAya ca| lOkAnAM lOkapAlAnAmakarOdvAmanaM patim||21|| |
vEdAnAM sarvadEvAnAM dharmasya yazasaH zriyaH| maGgalAnAM vratAnAM ca kalpaM svargApavargayOH||22|| |
upEndraM kalpayAM cakrE patiM sarvavibhUtayE| tadA sarvANi bhUtAni bhRzaM mumudirE nRpa||23|| |
tatastvindraH puraskRtya dEvayAnEna vAmanam| lOkapAlairdivaM ninyE brahmaNA cAnumOditaH||24|| |
prApya tribhuvanaM cEndra upEndrabhujapAlitaH| zriyA paramayA juSTO mumudE gatasAdhvasaH||25|| |
brahmA zarvaH kumArazca bhRgvAdyA munayO nRpa| pitaraH sarvabhUtAni siddhA vaimAnikAzca yE||26|| |
sumahatkarma tadviSNOrgAyantaH paramadbhutam| dhiSNyAni svAni tE jagmuraditiM ca zazaMsirE||27|| |
sarvamEtanmayAkhyAtaM bhavataH kulanandana| urukramasya caritaM zrOtRRNAmaghamOcanam||28|| |
pAraM mahimna uruvikramatO gRNAnO yaH pArthivAni vimamE sa rajAMsi martyaH| kiM jAyamAna uta jAta upaiti martya ityAha mantradRgRSiH puruSasya yasya||29|| |
ya idaM dEvadEvasya harEradbhutakarmaNaH| avatArAnucaritaM zRNvanyAti parAM gatim||30|| |
kriyamANE karmaNIdaM daivE pitryE'tha mAnuSE yatra yatrAnukIrtyEta tattESAM sukRtaM viduH||31|| |
||iti zrImadbhAgavatE mahApurANE pAramahaMsyAM saMhitAyAM aSTamaskandhE trayOviMzO'dhyAyaH||
