From StotraSamhita

dwitIyO'dhyAyaH

zrIzuka uvAca

AsIdgirivarO rAjaMstrikUTa iti vizrutaH| kSIrOdEnAvRtaH zrImAnyOjanAyutamucchritaH||1||

tAvatA vistRtaH paryaktribhiH zRGgaiH payOnidhim| dizaH khaM rOcayannAstE raupyAyasahiraNmayaiH||2||

anyaizca kakubhaH sarvA ratnadhAtuvicitritaiH| nAnAdrumalatAgulmairnirghOSairnirjharAmbhasAm||3||

sa cAvanijyamAnAGghriH samantAtpayaUrmibhiH| karOti zyAmalAM bhUmiM harinmarakatAzmabhiH||4||

siddhacAraNagandharvairvidyAdharamahOragaiH| kinnarairapsarObhizca krIDadbhirjuSTakandaraH||5||

yatra saGgItasannAdairnadadguhamamarSayA| abhigarjanti harayaH zlAghinaH parazaGkayA||6||

nAnAraNyapazuvrAta saGkuladrONyalaGkRtaH| citradrumasurOdyAna kalakaNThavihaGgamaH||7||

saritsarObhiracchOdaiH pulinairmaNivAlukaiH| dEvastrImajjanAmOda saurabhAmbvanilairyutaH||8||

tasya drONyAM bhagavatO varuNasya mahAtmanaH| udyAnamRtumannAma AkrIDaM surayOSitAm||9||

sarvatO'laGkRtaM divyairnityapuSpaphaladrumaiH| mandAraiH pArijAtaizca pATalAzOkacampakaiH||10||

cUtaiH piyAlaiH panasairAmrairAmrAtakairapi| kramukairnArikElaizca kharjUrairbIjapUrakaiH||11||

madhukaiH zAlatAlaizca tamAlairasanArjunaiH| ariSTODumbaraplakSairvaTaiH kiMzukacandanaiH||12||

picumardaiH kOvidAraiH saralaiH suradArubhiH| drAkSEkSurambhAjambubhirbadaryakSAbhayAmalaiH||13||

bilvaiH kapitthairjambIrairvRtO bhallAtakAdibhiH| tasminsaraH suvipulaM lasatkAJcanapaGkajam||14||

kumudOtpalakahlAra zatapatrazriyOrjitam| mattaSaTpadanirghuSTaM zakuntaizca kalasvanaiH||15||

haMsakAraNDavAkIrNaM cakrAhvaiH sArasairapi| jalakukkuTakOyaSTi dAtyUhakulakUjitam||16||

matsyakacchapasaJcAra calatpadmarajaHpayaH| kadambavEtasanala nIpavaJjulakairvRtam||17||

kundaiH kurubakAzOkaiH zirISaiH kUTajEGgudaiH| kubjakaiH svarNayUthIbhirnAgapunnAgajAtibhiH||18||

mallikAzatapatraizca mAdhavIjAlakAdibhiH| zObhitaM tIrajaizcAnyairnityartubhiralaM drumaiH||19||

tatraikadA tadgirikAnanAzrayaH karENubhirvAraNayUthapazcaran| sakaNTakaM kIcakavENuvEtravadvizAlagulmaM prarujanvanaspatIn||20||

yadgandhamAtrAddharayO gajEndrA vyAghrAdayO vyAlamRgAH sakhaDgAH| mahOragAzcApi bhayAddravanti sagaurakRSNAH sarabhAzcamaryaH||21||

vRkA varAhA mahiSarkSazalyA gOpucchazAlAvRkamarkaTAzca| anyatra kSudrA hariNAH zazAdayazcarantyabhItA yadanugrahENa||22||

sa gharmataptaH karibhiH karENubhirvRtO madacyutkarabhairanudrutaH| giriM garimNA paritaH prakampayanniSEvyamANO'likulairmadAzanaiH||23||

sarO'nilaM paGkajarENurUSitaM jighranvidUrAnmadavihvalEkSaNaH| vRtaH svayUthEna tRSArditEna tatsarOvarAbhyAsamathAgamaddrutam||24||

vigAhya tasminnamRtAmbu nirmalaM hEmAravindOtpalarENurUSitam| papau nikAmaM nijapuSkarOddhRtamAtmAnamadbhiH snapayangataklamaH||25||

sa puSkarENOddhRtazIkarAmbubhirnipAyayansaMsnapayanyathA gRhI| ghRNI karENuH karabhAMzca durmadO nAcaSTa kRcchraM kRpaNO'jamAyayA||26||

taM tatra kazcinnRpa daivacOditO grAhO balIyAMzcaraNE ruSAgrahIt| yadRcchayaivaM vyasanaM gatO gajO yathAbalaM sO'tibalO vicakramE||27||

tathAturaM yUthapatiM karENavO vikRSyamANaM tarasA balIyasA| vicukruzurdInadhiyO'parE gajAH pArSNigrahAstArayituM na cAzakan||28||

niyudhyatOrEvamibhEndranakrayOrvikarSatOrantaratO bahirmithaH| samAH sahasraM vyagamanmahIpatE saprANayOzcitramamaMsatAmarAH||29||

tatO gajEndrasya manObalaujasAM kAlEna dIrghENa mahAnabhUdvyayaH| vikRSyamANasya jalE'vasIdatO viparyayO'bhUtsakalaM jalaukasaH||30||

itthaM gajEndraH sa yadApa saGkaTaM prANasya dEhI vivazO yadRcchayA| apArayannAtmavimOkSaNE ciraM dadhyAvimAM buddhimathAbhyapadyata||31||

na mAmimE jJAtaya AturaM gajAH kutaH kariNyaH prabhavanti mOcitum| grAhENa pAzEna vidhAturAvRtO'pyahaM ca taM yAmi paraM parAyaNam||32||

yaH kazcanEzO balinO'ntakOragAtpracaNDavEgAdabhidhAvatO bhRzam bhItaM prapannaM paripAti yadbhayAnmRtyuH pradhAvatyaraNaM tamImahi||33||

||iti zrImadbhAgavatE mahApurANE pAramahaMsyAM saMhitAyAM aSTamaskandhE dwitIyO'dhyAyaH||

See Also

• http://vedabase.net/sb/8/2/en