From StotraSamhita
< Bhagavatam | Skandha 08
dazamO'dhyAyaH
zrIzuka uvAca
iti dAnavadaitEyA nAvindannamRtaM nRpa| yuktAH karmaNi yattAzca vAsudEvaparAGmukhAH||1|| |
sAdhayitvAmRtaM rAjanpAyayitvA svakAnsurAn| pazyatAM sarvabhUtAnAM yayau garuDavAhanaH||2|| |
sapatnAnAM parAmRddhiM dRSTvA tE ditinandanAH| amRSyamANA utpEturdEvAnpratyudyatAyudhAH||3|| |
tataH suragaNAH sarvE sudhayA pItayaidhitAH| pratisaMyuyudhuH zastrairnArAyaNapadAzrayAH||4|| |
tatra daivAsurO nAma raNaH paramadAruNaH| rOdhasyudanvatO rAjaMstumulO rOmaharSaNaH||5|| |
tatrAnyOnyaM sapatnAstE saMrabdhamanasO raNE| samAsAdyAsibhirbANairnijaghnurvividhAyudhaiH||6|| |
zaGkhatUryamRdaGgAnAM bhErIDamariNAM mahAn| hastyazvarathapattInAM nadatAM nisvanO'bhavat||7|| |
rathinO rathibhistatra pattibhiH saha pattayaH| hayA hayairibhAzcEbhaiH samasajjanta saMyugE||8|| |
uSTraiH kEcidibhaiH kEcidaparE yuyudhuH kharaiH| kEcidgauramukhairRkSairdvIpibhirharibhirbhaTAH||9|| |
gRdhraiH kaGkairbakairanyE zyEnabhAsaistimiGgilaiH| zarabhairmahiSaiH khaDgairgOvRSairgavayAruNaiH||10|| |
zivAbhirAkhubhiH kEcitkRkalAsaiH zazairnaraiH| bastairEkE kRSNasArairhaMsairanyE ca sUkaraiH||11|| |
anyE jalasthalakhagaiH sattvairvikRtavigrahaiH| sEnayOrubhayO rAjanvivizustE'gratO'grataH||12|| |
citradhvajapaTai rAjannAtapatraiH sitAmalaiH| mahAdhanairvajradaNDairvyajanairbArhacAmaraiH||13|| |
vAtOddhUtOttarOSNISairarcirbhirvarmabhUSaNaiH| sphuradbhirvizadaiH zastraiH sutarAM sUryarazmibhiH||14|| |
dEvadAnavavIrANAM dhvajinyau pANDunandana| rEjaturvIramAlAbhiryAdasAmiva sAgarau||15|| |
vairOcanO baliH saGkhyE sO'surANAM camUpatiH| yAnaM vaihAyasaM nAma kAmagaM mayanirmitam||16|| |
sarvasAGgrAmikOpEtaM sarvAzcaryamayaM prabhO| apratarkyamanirdEzyaM dRzyamAnamadarzanam||17|| |
AsthitastadvimAnAgryaM sarvAnIkAdhipairvRtaH| bAlavyajanachatrAgryai rEjE candra ivOdayE||18|| |
tasyAsansarvatO yAnairyUthAnAM patayO'surAH| namuciH zambarO bANO vipracittirayOmukhaH||19|| |
dvimUrdhA kAlanAbhO'tha prahEtirhEtirilvalaH| zakunirbhUtasantApO vajradaMSTrO virOcanaH||20|| |
hayagrIvaH zaGkuzirAH kapilO mEghadundubhiH| tArakazcakradRkSumbhO nizumbhO jambha utkalaH||21|| |
ariSTO'riSTanEmizca mayazca tripurAdhipaH| anyE paulOmakAlEyA nivAtakavacAdayaH||22|| |
alabdhabhAgAH sOmasya kEvalaM klEzabhAginaH| sarva EtE raNamukhE bahuzO nirjitAmarAH||23|| |
siMhanAdAnvimuJcantaH zaGkhAndadhmurmahAravAn| dRSTvA sapatnAnutsiktAnbalabhitkupitO bhRzam||24|| |
airAvataM dikkariNamArUDhaH zuzubhE svarAT| yathA sravatprasravaNamudayAdrimaharpatiH||25|| |
tasyAsansarvatO dEvA nAnAvAhadhvajAyudhAH| lOkapAlAH sahagaNairvAyvagnivaruNAdayaH||26|| |
tE'nyOnyamabhisaMsRtya kSipantO marmabhirmithaH| AhvayantO vizantO'grE yuyudhurdvandvayOdhinaH||27|| |
yuyOdha balirindrENa tArakENa guhO'syata| varuNO hEtinAyudhyanmitrO rAjanprahEtinA||28|| |
yamastu kAlanAbhEna vizvakarmA mayEna vai| zambarO yuyudhE tvaSTrA savitrA tu virOcanaH||29|| |
aparAjitEna namucirazvinau vRSaparvaNA| sUryO balisutairdEvO bANajyESThaiH zatEna ca||30|| |
rAhuNA ca tathA sOmaH pulOmnA yuyudhE'nilaH| nizumbhazumbhayOrdEvI bhadrakAlI tarasvinI||31|| |
vRSAkapistu jambhEna mahiSENa vibhAvasuH| ilvalaH saha vAtApirbrahmaputrairarindama||32|| |
kAmadEvEna durmarSa utkalO mAtRbhiH saha| bRhaspatizcOzanasA narakENa zanaizcaraH||33|| |
marutO nivAtakavacaiH kAlEyairvasavO'marAH| vizvEdEvAstu paulOmai rudrAH krOdhavazaiH saha||34|| |
ta EvamAjAvasurAH surEndrA dvandvEna saMhatya ca yudhyamAnAH| anyOnyamAsAdya nijaghnurOjasA jigISavastIkSNazarAsitOmaraiH||35|| |
bhuzuNDibhizcakragadarSTipaTTizaiH zaktyulmukaiH prAsaparazvadhairapi| nistriMzabhallaiH parighaiH samudgaraiH sabhindipAlaizca zirAMsi cicchiduH||36|| |
gajAsturaGgAH sarathAH padAtayaH sArOhavAhA vividhA vikhaNDitAH| nikRttabAhUruzirOdharAGghrayazchinnadhvajESvAsatanutrabhUSaNAH||37|| |
tESAM padAghAtarathAGgacUrNitAdAyOdhanAdulbaNa utthitastadA| rENurdizaH khaM dyumaNiM ca chAdayannyavartatAsRksrutibhiH pariplutAt||38|| |
zirObhiruddhUtakirITakuNDalaiH saMrambhadRgbhiH paridaSTadacchadaiH| mahAbhujaiH sAbharaNaiH sahAyudhaiH sA prAstRtA bhUH karabhOrubhirbabhau||39|| |
kabandhAstatra cOtpEtuH patitasvazirO'kSibhiH| udyatAyudhadOrdaNDairAdhAvantO bhaTAnmRdhE||40|| |
balirmahEndraM dazabhistribhirairAvataM zaraiH| caturbhizcaturO vAhAnEkEnArOhamArcchayat||41|| |
sa tAnApatataH zakrastAvadbhiH zIghravikramaH| cicchEda nizitairbhallairasamprAptAnhasanniva||42|| |
tasya karmOttamaM vIkSya durmarSaH zaktimAdadE| tAM jvalantIM mahOlkAbhAM hastasthAmacchinaddhariH||43|| |
tataH zUlaM tataH prAsaM tatastOmaramRSTayaH| yadyacchastraM samAdadyAtsarvaM tadacchinadvibhuH||44|| |
sasarjAthAsurIM mAyAmantardhAnagatO'suraH| tataH prAdurabhUcchailaH surAnIkOpari prabhO||45|| |
tatO nipEtustaravO dahyamAnA davAgninA| zilAH saTaGkazikharAzcUrNayantyO dviSadbalam||46|| |
mahOragAH samutpEturdandazUkAH savRzcikAH| siMhavyAghravarAhAzca mardayantO mahAgajAH||47|| |
yAtudhAnyazca zatazaH zUlahastA vivAsasaH| chindhi bhindhIti vAdinyastathA rakSOgaNAH prabhO||48|| |
tatO mahAghanA vyOmni gambhIraparuSasvanAH| aGgArAnmumucurvAtairAhatAH stanayitnavaH||49|| |
sRSTO daityEna sumahAnvahniH zvasanasArathiH| sAMvartaka ivAtyugrO vibudhadhvajinImadhAk||50|| |
tataH samudra udvElaH sarvataH pratyadRzyata| pracaNDavAtairuddhUta taraGgAvartabhISaNaH||51|| |
EvaM daityairmahAmAyairalakSyagatibhI raNE| sRjyamAnAsu mAyAsu viSEduH surasainikAH||52|| |
na tatpratividhiM yatra vidurindrAdayO nRpa| dhyAtaH prAdurabhUttatra bhagavAnvizvabhAvanaH||53|| |
tataH suparNAMsakRtAGghripallavaH pizaGgavAsA navakaJjalOcanaH| adRzyatASTAyudhabAhurullasacchrIkaustubhAnarghyakirITakuNDalaH||54|| |
tasminpraviSTE'surakUTakarmajA mAyA vinEzurmahinA mahIyasaH| svapnO yathA hi pratibOdha AgatE harismRtiH sarvavipadvimOkSaNam||55|| |
dRSTvA mRdhE garuDavAhamibhArivAha Avidhya zUlamahinOdatha kAlanEmiH| tallIlayA garuDamUrdhni patadgRhItvA tEnAhanannRpa savAhamariM tryadhIzaH||56|| |
mAlI sumAlyatibalau yudhi pEtaturyaccakrENa kRttazirasAvatha mAlyavAMstam Ahatya tigmagadayAhanadaNDajEndraM tAvacchirO'cchinadarErnadatO'riNAdyaH||57|| |
||iti zrImadbhAgavatE mahApurANE pAramahaMsyAM saMhitAyAM aSTamaskandhE dazamO'dhyAyaH||
