From StotraSamhita
< Bhagavatam | Skandha 10
caturdazO'dhyAyaH
zrIbrahmOvAca
naumIDya tE'bhravapuSE taDidambarAya guJjAvataMsaparipicchalasanmukhAya| vanyasrajE kavalavEtraviSANavENu lakSmazriyE mRdupadE pazupAGgajAya||1|| |
asyApi dEva vapuSO madanugrahasya svEcchAmayasya na tu bhUtamayasya kO'pi| nEzE mahi tvavasituM manasAntarENa sAkSAttavaiva kimutAtmasukhAnubhUtEH||2|| |
jJAnE prayAsamudapAsya namanta Eva jIvanti sanmukharitAM bhavadIyavArtAm| sthAnE sthitAH zrutigatAM tanuvAGmanObhir yE prAyazO'jita jitO'pyasi taistrilOkyAm||3|| |
zrEyaHsRtiM bhaktimudasya tE vibhO klizyanti yE kEvalabOdhalabdhayE| tESAmasau klEzala Eva ziSyatE nAnyadyathA sthUlatuSAvaghAtinAm||4|| |
purEha bhUmanbahavO'pi yOginastvadarpitEhA nijakarmalabdhayA| vibudhya bhaktyaiva kathOpanItayA prapEdirE'JjO'cyuta tE gatiM parAm||5|| |
tathApi bhUmanmahimAguNasya tE vibOddhumarhatyamalAntarAtmabhiH| avikriyAtsvAnubhavAdarUpatO hyananyabOdhyAtmatayA na cAnyathA||6|| |
guNAtmanastE'pi guNAnvimAtuM hitAvatIRnasya ka IzirE'sya| kAlEna yairvA vimitAH sukalpairbhUpAMzavaH khE mihikA dyubhAsaH||7|| |
tattE'nukampAM susamIkSamANO bhuJjAna EvAtmakRtaM vipAkam| hRdvAgvapurbhirvidadhannamastE jIvEta yO muktipadE sa dAyabhAk||8|| |
pazyEza mE'nAryamananta AdyE parAtmani tvayyapi mAyimAyini| mAyAM vitatyEkSitumAtmavaibhavaM hyahaM kiyAnaicchamivArciragnau||9|| |
ataH kSamasvAcyuta mE rajObhuvO hyajAnatastvatpRthagIzamAninaH| ajAvalEpAndhatamO'ndhacakSuSa ESO'nukampyO mayi nAthavAniti||10|| |
kvAhaM tamOmahadahaM khacarAgnivArbhU saMvESTitANDaghaTasaptavitastikAyaH| kvEdRgvidhAvigaNitANDaparANucaryA vAtAdhvarOmavivarasya ca tE mahitvam||11|| |
utkSEpaNaM garbhagatasya pAdayOH kiM kalpatE mAturadhOkSajAgasE| kimastinAstivyapadEzabhUSitaM tavAsti kukSEH kiyadapyanantaH||12|| |
jagattrayAntOdadhisamplavOdE nArAyaNasyOdaranAbhinAlAt| vinirgatO'jastviti vAGna vai mRSA kintvIzvara tvanna vinirgatO'smi||13|| |
nArAyaNastvaM na hi sarvadEhinAmAtmAsyadhIzAkhilalOkasAkSI| nArAyaNO'GgaM narabhUjalAyanAttaccApi satyaM na tavaiva mAyA||14|| |
taccEjjalasthaM tava sajjagadvapuH kiM mE na dRSTaM bhagavaMstadaiva| kiM vA sudRSTaM hRdi mE tadaiva kiM nO sapadyEva punarvyadarzi||15|| |
atraiva mAyAdhamanAvatArE hyasya prapaJcasya bahiH sphuTasya| kRtsnasya cAntarjaTharE jananyA mAyAtvamEva prakaTIkRtaM tE||16|| |
yasya kukSAvidaM sarvaM sAtmaM bhAti yathA tathA| tattvayyapIha tatsarvaM kimidaM mAyayA vinA||17|| |
adyaiva tvadRtE'sya kiM mama na tE mAyAtvamAdarzitam EkO'si prathamaM tatO vrajasuhRdvatsAH samastA api| tAvantO'si caturbhujAstadakhilaiH sAkaM mayOpAsitAs tAvantyEva jagantyabhUstadamitaM brahmAdvayaM ziSyatE||18|| |
ajAnatAM tvatpadavImanAtmanyAtmAtmanA bhAsi vitatya mAyAm| sRSTAvivAhaM jagatO vidhAna iva tvamESO'nta iva trinEtraH||19|| |
surESvRSiSvIza tathaiva nRSvapi tiryakSu yAdaHsvapi tE'janasya| janmAsatAM durmadanigrahAya prabhO vidhAtaH sadanugrahAya ca||20|| |
kO vEtti bhUmanbhagavanparAtmanyOgEzvarOtIrbhavatastrilOkyAm| kva vA kathaM vA kati vA kadEti vistArayankrIDasi yOgamAyAm||21|| |
tasmAdidaM jagadazESamasatsvarUpaM svapnAbhamastadhiSaNaM puruduHkhaduHkham| tvayyEva nityasukhabOdhatanAvanantE mAyAta udyadapi yatsadivAvabhAti||22|| |
EkastvamAtmA puruSaH purANaH satyaH svayaM jyOtirananta AdyaH| nityO'kSarO'jasrasukhO niraJjanaH pUrNAdvayO mukta upAdhitO'mRtaH||23|| |
EvaMvidhaM tvAM sakalAtmanAmapi svAtmAnamAtmAtmatayA vicakSatE| gurvarkalabdhOpaniSatsucakSuSA yE tE tarantIva bhavAnRtAmbudhim||24|| |
AtmAnamEvAtmatayAvijAnatAM tEnaiva jAtaM nikhilaM prapaJcitam| jJAnEna bhUyO'pi ca tatpralIyatE rajjvAmahErbhOgabhavAbhavau yathA||25|| |
ajJAnasaMjJau bhavabandhamOkSau dvau nAma nAnyau sta RtajJabhAvAt| ajasracityAtmani kEvalE parE vicAryamANE taraNAvivAhanI||26|| |
tvAmAtmAnaM paraM matvA paramAtmAnamEva ca| AtmA punarbahirmRgya ahO'jJajanatAjJatA||27|| |
antarbhavE'nanta bhavantamEva hyatattyajantO mRgayanti santaH| asantamapyantyahimantarENa santaM guNaM taM kimu yanti santaH||28|| |
athApi tE dEva padAmbujadvaya prasAdalEzAnugRhIta Eva hi| jAnAti tattvaM bhagavanmahimnO na cAnya EkO'pi ciraM vicinvan||29|| |
tadastu mE nAtha sa bhUribhAgO bhavE'tra vAnyatra tu vA tirazcAm| yEnAhamEkO'pi bhavajjanAnAM bhUtvA niSEvE tava pAdapallavam||30|| |
ahO'tidhanyA vrajagOramaNyaH stanyAmRtaM pItamatIva tE mudA| yAsAM vibhO vatsatarAtmajAtmanA yattRptayE'dyApi na cAlamadhvarAH||31|| |
ahO bhAgyamahO bhAgyaM nandagOpavrajaukasAm| yanmitraM paramAnandaM pUrNaM brahma sanAtanam||32|| |
ESAM tu bhAgyamahimAcyuta tAvadAstAm EkAdazaiva hi vayaM bata bhUribhAgAH| EtaddhRSIkacaSakairasakRtpibAmaH zarvAdayO'GghryudajamadhvamRtAsavaM tE||33|| |
tadbhUribhAgyamiha janma kimapyaTavyAM yadgOkulE'pi katamAGghrirajO'bhiSEkam| yajjIvitaM tu nikhilaM bhagavAnmukundas tvadyApi yatpadarajaH zrutimRgyamEva||34|| |
ESAM ghOSanivAsinAmuta bhavAnkiM dEva rAtEti naz cEtO vizvaphalAtphalaM tvadaparaM kutrApyayanmuhyati| sadvESAdiva pUtanApi sakulA tvAmEva dEvApitA yaddhAmArthasuhRtpriyAtmatanayaprANAzayAstvatkRtE||35|| |
tAvadrAgAdayaH stEnAstAvatkArAgRhaM gRham| tAvanmOhO'GghrinigaDO yAvatkRSNa na tE janAH||36|| |
prapaJcaM niSprapaJcO'pi viDambayasi bhUtalE| prapannajanatAnanda sandOhaM prathituM prabhO||37|| |
jAnanta Eva jAnantu kiM bahUktyA na mE prabhO| manasO vapuSO vAcO vaibhavaM tava gOcaraH||38|| |
anujAnIhi mAM kRSNa sarvaM tvaM vEtsi sarvadRk| tvamEva jagatAM nAthO jagadEtattavArpitam||39|| |
zrIkRSNa vRSNikulapuSkarajOSadAyin kSmAnirjaradvijapazUdadhivRddhikArin| uddharmazArvarahara kSitirAkSasadhrug AkalpamArkamarhanbhagavannamastE||40|| |
zrIzuka uvAca
ityabhiSTUya bhUmAnaM triH parikramya pAdayOH| natvAbhISTaM jagaddhAtA svadhAma pratyapadyata||41|| |
tatO'nujJApya bhagavAnsvabhuvaM prAgavasthitAn| vatsAnpulinamAninyE yathApUrvasakhaM svakam||42|| |
Ekasminnapi yAtE'bdE prANEzaM cAntarAtmanaH| kRSNamAyAhatA rAjankSaNArdhaM mEnirE'rbhakAH||43|| |
kiM kiM na vismarantIha mAyAmOhitacEtasaH| yanmOhitaM jagatsarvamabhIkSNaM vismRtAtmakam||44|| |
Ucuzca suhRdaH kRSNaM svAgataM tE'tiraMhasA| naikO'pyabhOji kavala EhItaH sAdhu bhujyatAm||45|| |
tatO hasanhRSIkEzO'bhyavahRtya sahArbhakaiH| darzayaMzcarmAjagaraM nyavartata vanAdvrajam||46|| |
barhaprasUnavanadhAtuvicitritAGgaH prOddAmavENudalazRGgaravOtsavADhyaH| vatsAngRNannanugagItapavitrakIrtir gOpIdRgutsavadRziH pravivEza gOSTham||47|| |
adyAnEna mahAvyAlO yazOdAnandasUnunA| hatO'vitA vayaM cAsmAditi bAlA vrajE jaguH||48|| |
zrIrAjOvAca
brahmanparOdbhavE kRSNE iyAnprEmA kathaM bhavEt| yO'bhUtapUrvastOkESu svOdbhavESvapi kathyatAm||49|| |
zrIzuka uvAca
sarvESAmapi bhUtAnAM nRpa svAtmaiva vallabhaH| itarE'patyavittAdyAstadvallabhatayaiva hi||50|| |
tadrAjEndra yathA snEhaH svasvakAtmani dEhinAm| na tathA mamatAlambi putravittagRhAdiSu||51|| |
dEhAtmavAdinAM puMsAmapi rAjanyasattama| yathA dEhaH priyatamastathA na hyanu yE ca tam||52|| |
dEhO'pi mamatAbhAkcEttarhyasau nAtmavatpriyaH| yajjIryatyapi dEhE'sminjIvitAzA balIyasI||53|| |
tasmAtpriyatamaH svAtmA sarvESAmapi dEhinAm| tadarthamEva sakalaM jagadEtaccarAcaram||54|| |
kRSNamEnamavEhi tvamAtmAnamakhilAtmanAm| jagaddhitAya sO'pyatra dEhIvAbhAti mAyayA||55|| |
vastutO jAnatAmatra kRSNaM sthAsnu cariSNu ca| bhagavadrUpamakhilaM nAnyadvastviha kiJcana||56|| |
sarvESAmapi vastUnAM bhAvArthO bhavati sthitaH| tasyApi bhagavAnkRSNaH kimatadvastu rUpyatAm||57|| |
samAzritA yE padapallavaplavaM mahatpadaM puNyayazO murArEH| bhavAmbudhirvatsapadaM paraM padaM padaM padaM yadvipadAM na tESAm||58|| |
EtattE sarvamAkhyAtaM yatpRSTO'hamiha tvayA| tatkaumArE harikRtaM paugaNDE parikIrtitam||59|| |
EtatsuhRdbhizcaritaM murArEraghArdanaM zAdvalajEmanaM ca| vyaktEtaradrUpamajOrvabhiSTavaM zRNvangRNannEti narO'khilArthAn||60|| |
EvaM vihAraiH kaumAraiH kaumAraM jahaturvrajE nilAyanaiH sEtubandhairmarkaTOtplavanAdibhiH||61|| |
||iti zrImadbhAgavatE mahApurANE pAramahaMsyAM saMhitAyAM dazamaskandhE pUrvArdhE caturdazO'dhyAyaH||
