From StotraSamhita
< Bhagavatam | Skandha 07
prathamO'dhyAyaH
zrIrAjOvAca
samaH priyaH suhRdbrahmanbhUtAnAM bhagavAnsvayam| indrasyArthE kathaM daityAnavadhIdviSamO yathA||1|| |
na hyasyArthaH suragaNaiH sAkSAnniHzrEyasAtmanaH| naivAsurEbhyO vidvESO nOdvEgazcAguNasya hi||2|| |
iti naH sumahAbhAga nArAyaNaguNAnprati| saMzayaH sumahAnjAtastadbhavAMzchEttumarhati||3|| |
zrIRSiruvAca
sAdhu pRSTaM mahArAja harEzcaritamadbhutam| yadbhAgavatamAhAtmyaM bhagavadbhaktivardhanam||4|| |
gIyatE paramaM puNyamRSibhirnAradAdibhiH| natvA kRSNAya munayE kathayiSyE harEH kathAm||5|| |
nirguNO'pi hyajO'vyaktO bhagavAnprakRtEH paraH| svamAyAguNamAvizya bAdhyabAdhakatAM gataH||6|| |
sattvaM rajastama iti prakRtErnAtmanO guNAH| na tESAM yugapadrAjanhrAsa ullAsa Eva vA||7|| |
jayakAlE tu sattvasya dEvarSInrajasO'surAn| tamasO yakSarakSAMsi tatkAlAnuguNO'bhajat||8|| |
jyOtirAdirivAbhAti saGghAtAnna vivicyatE| vidantyAtmAnamAtmasthaM mathitvA kavayO'ntataH||9|| |
yadA sisRkSuH pura AtmanaH parO rajaH sRjatyESa pRthaksvamAyayA| sattvaM vicitrAsu riraMsurIzvaraH zayiSyamANastama Irayatyasau||10|| |
kAlaM carantaM sRjatIza AzrayaM pradhAnapumbhyAM naradEva satyakRt ya ESa rAjannapi kAla IzitA sattvaM surAnIkamivaidhayatyataH tatpratyanIkAnasurAnsurapriyO rajastamaskAnpramiNOtyuruzravAH||11|| |
atraivOdAhRtaH pUrvamitihAsaH surarSiNA| prItyA mahAkratau rAjanpRcchatE'jAtazatravE||12|| |
dRSTvA mahAdbhutaM rAjA rAjasUyE mahAkratau| vAsudEvE bhagavati sAyujyaM cEdibhUbhujaH||13|| |
tatrAsInaM suraRSiM rAjA pANDusutaH kratau| papraccha vismitamanA munInAM zRNvatAmidam||14|| |
zrIyudhiSThira uvAca
ahO atyadbhutaM hyEtaddurlabhaikAntinAmapi| vAsudEvE parE tattvE prAptizcaidyasya vidviSaH||15|| |
EtadvEditumicchAmaH sarva Eva vayaM munE| bhagavannindayA vEnO dvijaistamasi pAtitaH||16|| |
damaghOSasutaH pApa Arabhya kalabhASaNAt| sampratyamarSI gOvindE dantavakrazca durmatiH||17|| |
zapatOrasakRdviSNuM yadbrahma paramavyayam| zvitrO na jAtO jihvAyAM nAndhaM vivizatustamaH||18|| |
kathaM tasminbhagavati duravagrAhyadhAmani| pazyatAM sarvalOkAnAM layamIyaturaJjasA||19|| |
EtadbhrAmyati mE buddhirdIpArciriva vAyunA| brUhyEtadadbhutatamaM bhagavAnhyatra kAraNam||20|| |
zrIbAdarAyaNiruvAca
rAjJastadvaca AkarNya nAradO bhagavAnRSiH| tuSTaH prAha tamAbhASya zRNvatyAstatsadaH kathAH||21|| |
zrInArada uvAca
nindanastavasatkAra nyakkArArthaM kalEvaram| pradhAnaparayO rAjannavivEkEna kalpitam||22|| |
hiMsA tadabhimAnEna daNDapAruSyayOryathA| vaiSamyamiha bhUtAnAM mamAhamiti pArthiva||23|| |
yannibaddhO'bhimAnO'yaM tadvadhAtprANinAM vadhaH tathA na yasya kaivalyAdabhimAnO'khilAtmanaH parasya damakarturhi hiMsA kEnAsya kalpyatE||24|| |
tasmAdvairAnubandhEna nirvairENa bhayEna vA| snEhAtkAmEna vA yuJjyAtkathaJcinnEkSatE pRthak||25|| |
yathA vairAnubandhEna martyastanmayatAmiyAt| na tathA bhaktiyOgEna iti mE nizcitA matiH||26|| |
kITaH pEzaskRtA ruddhaH kuDyAyAM tamanusmaran| saMrambhabhayayOgEna vindatE tatsvarUpatAm||27|| |
EvaM kRSNE bhagavati mAyAmanuja IzvarE| vairENa pUtapApmAnastamApuranucintayA||28|| |
kAmAddvESAdbhayAtsnEhAdyathA bhaktyEzvarE manaH| AvEzya tadaghaM hitvA bahavastadgatiM gatAH||29|| |
gOpyaH kAmAdbhayAtkaMsO dvESAccaidyAdayO nRpAH| sambandhAdvRSNayaH snEhAdyUyaM bhaktyA vayaM vibhO||30|| |
katamO'pi na vEnaH syAtpaJcAnAM puruSaM prati| tasmAtkEnApyupAyEna manaH kRSNE nivEzayEt||31|| |
mAtRSvasrEyO vazcaidyO dantavakrazca pANDava| pArSadapravarau viSNOrviprazApAtpadacyutau||32|| |
zrIyudhiSThira uvAca
kIdRzaH kasya vA zApO haridAsAbhimarzanaH| azraddhEya ivAbhAti harErEkAntinAM bhavaH||33|| |
dEhEndriyAsuhInAnAM vaikuNThapuravAsinAm| dEhasambandhasambaddhamEtadAkhyAtumarhasi||34|| |
zrInArada uvAca
EkadA brahmaNaH putrA viSNulOkaM yadRcchayA| sanandanAdayO jagmuzcarantO bhuvanatrayam||35|| |
paJcaSaDDhAyanArbhAbhAH pUrvESAmapi pUrvajAH| digvAsasaH zizUnmatvA dvAHsthau tAnpratyaSEdhatAm||36|| |
azapankupitA EvaM yuvAM vAsaM na cArhathaH rajastamObhyAM rahitE pAdamUlE madhudviSaH pApiSThAmAsurIM yOniM bAlizau yAtamAzvataH||37|| |
EvaM zaptau svabhavanAtpatantau tau kRpAlubhiH| prOktau punarjanmabhirvAM tribhirlOkAya kalpatAm||38|| |
jajJAtE tau ditEH putrau daityadAnavavanditau| hiraNyakazipurjyESThO hiraNyAkSO'nujastataH||39|| |
hatO hiraNyakazipurhariNA siMharUpiNA| hiraNyAkSO dharOddhArE bibhratA zaukaraM vapuH||40|| |
hiraNyakazipuH putraM prahlAdaM kEzavapriyam| jighAMsurakarOnnAnA yAtanA mRtyuhEtavE||41|| |
taM sarvabhUtAtmabhUtaM prazAntaM samadarzanam| bhagavattEjasA spRSTaM nAzaknOddhantumudyamaiH||42|| |
tatastau rAkSasau jAtau kEzinyAM vizravaHsutau| rAvaNaH kumbhakarNazca sarvalOkOpatApanau||43|| |
tatrApi rAghavO bhUtvA nyahanacchApamuktayE| rAmavIryaM zrOSyasi tvaM mArkaNDEyamukhAtprabhO||44|| |
tAvatra kSatriyau jAtau mAtRSvasrAtmajau tava| adhunA zApanirmuktau kRSNacakrahatAMhasau||45|| |
vairAnubandhatIvrENa dhyAnEnAcyutasAtmatAm| nItau punarharEH pArzvaM jagmaturviSNupArSadau||46|| |
zrIyudhiSThira uvAca
vidvESO dayitE putrE kathamAsInmahAtmani brUhi mE bhagavanyEna prahlAdasyAcyutAtmatA||47|| |
||iti zrImadbhAgavatE mahApurANE pAramahaMsyAM saMhitAyAM saptamaskandhE prathamO'dhyAyaH||
